काठमाडौं (हाम्रो खेलकुद)– नेपाली राष्ट्रिय टोलीका गोलकिपर किरण चेम्जोङको माल्दिभियन क्लब टिसी स्पोटर्सले धिवेही प्रिमियर लिग (डिपिएल) मा प्रिमियर लिगमा स्थान सुरक्षित गरेको छ ।

गए राती भिक्ट्री स्पोर्टस क्लबलाई ४–१ ले हराउँदै किरणको टोली टिसी स्पोटर्सले डिपिएलमा स्थान पक्का गरेको हो । टिसी स्पोर्टस्सँगै नयाँ टोली ग्रिन स्ट्रिट पनि डिपिएलका लागि छनोट भएको छ ।

इगल्स क्लबलार्य १–० ले हराउँदै ग्रिन स्ट्रिटले २७ अंकका साथ शीर्षस्थानमा उक्लेको छ । समान २६ अंकका साथ माजिया र न्यू रेडियन्ट क्रमशः दोस्रो र तेस्रो स्थानमा छन् । यी दुईबीच हुने खेलले माले लिगको च्याम्पियन टुंगो लाग्नेछ । १४ खेलमा २२ अंकसहित किरणको टोली भने चौथो स्थानमा रहँदै डिपिएलमा छनोट हुन सफल भयो ।

किरणका अनुसार मालेबाट शीर्ष ४ र माल्दिभ्सकै अर्को ठाँउबाट छनोट हुने ४ टोलीबीच डिपिएल हुनेछ । ‘पहिलो चरण हामीले राम्रो गर्न सकेनौं । दोस्रो चरणमा भने प्रदर्शनमा निकै सुधार गर्यौं । जसका कारण हामी डिपिएलमा छनोट हुन सफल भयौं’ हाम्रो खेलकुद डटकमसँग खुसी साट्दै किरणले भने, ‘क्लब पनि मबाट एकदम खुसी छ । उनीहरु लामो समय क्लबमै बस्नु पर्छ भन्दैछन् । ’

किरण गत वर्ष टिसी स्पोर्टसमा आबद्ध भएका थिए । क्लबमा आबद्ध भएर पहिलो प्रतियोगिता बंगलादेशमा शेख कमाल गोल्ड कप जिताउन किरणले महत्वपूर्ण भूमिका निर्वाह गरेका थिए ।