काठमाडौँ (हाम्रो खेलकुद) – एएफसी यू२३ च्याम्पियनसिपको छनोट चरण अन्तर्गत समूह ‘डी’मा रहेको नेपालले सबै खेलमा पराजय भोग्दै प्रतियोगिताको अन्त्य गरेको छ। बुधबार भएको अन्तिम खेलमा नेपालले लेबनानसँग २-०को हार व्येहोर्यो।
नेपालले खेलको २८औं मिनेटमा पहिलो गोल खाएको थियो। डिफेन्सले हेडर क्लियर गर्न नसकेको बलमा लेबनानका हासान कुरानीले गोल गरेका थिए। नेपालले पछिल्ला खेलको तुलनामा सुधारिएको प्रदर्शन गरेपनि गोल गर्ने अवसरहरुमा भने चुकेको थियो।
खेलको ८७औं मिनेटमा नेपालले बराबरी गर्ने मौका पाएपनि सुमन लामा त्यसमा चुकेका थिए। उनले फार पोष्टमा एक्लै हुँदा आएको लो क्रसलाई गोलतर्फ मोड्न असफल रहेका थिए। त्यसअघि नेपालका सुनिल बलले दोश्रो हाफको सुरुवाततिर प्रहार गरेको फ्रिकिक पोष्टबाट केहि माथिबाट बाहिरिएको थियो। खेलको अन्तिम समयमा हासान कुरानीले व्यक्तिगत दोश्रो गोल गर्दै लेबनानको जित पक्का गरेका थिए।
नेपाल यस नतिजासँगै प्रतियोगितामा कुनै गोल नगरी स्वदेश फर्कने भएको छ। समूह चरणका तिनै खेलमा पराजित भएको नेपाल कुनै अंक नजोडी समूहको पुछारमा रह्यो।
