म्याड्रिड (एजेन्सी)– रियल म्याड्रिडका मिडफिल्डर टोनी क्रुस भित्राउनमा म्यानचेस्टर युनाइटेडले चासो देखाएको छ । स्पेनिस सञ्चारमाध्यमका अनुसार जर्मन अन्तर्राष्ट्रिय खेलाडी क्रुस भित्राउनमा युनाइटेडसँग इन्टर मिलान र युभेन्ट्स प्रतिस्र्पामा छन् ।
डेरियो गोलका अनुसार युनाइटेड, इन्टर र युभेन्ट्स तीनै क्लब क्रुसलाई भित्राउन जोडतोडले लागेका छन् । यद्दपी युनाइेडका गोलकिपर डेभिड डि जियासँग साट्ने सर्तमा भने रियल क्रुसलाई छाड्न तयार हुने अडकल काटिएको छ । तर, रियलका प्रशिक्षक जिनेदिन जिदान भने क्लबका उत्कृष्ट खेलाडीमध्येका एक क्रुसलाई क्लबमा हेर्न चाहन्छन् । उनले व्यक्तिगत रुपमा पनि क्रुसलाई क्लब नछाड्ने आग्रह गरेको बताइएको छ ।
बायर्न म्युनिखका २७ बर्षे पूर्व मिडफिल्डर क्रुसले पछिल्लो तीनबर्षमा रियलमा उच्च प्रदर्शन गर्दै आइरहेका छन् । क्लबका स्तरीय खेलाडीसँगै उच्च प्रदर्शन गरिरहेका उनले लामो समय टोलीबाट खेलुन् भन्ने रियलले पनि चाहेको बताइएको छ । खेल जीवनमा तीनवटा च्याम्पियन्स लिग उपाधि जितिसकेका क्रुसले पछिल्ला दुईवटा रियलबाट जितेका थिए ।
विश्व कप विजेता क्रुस र लुका मोड्रिचबीच रियलको मिडफिल्ड साझेदारीलाई उत्कृष्ट मानिन्छ र उनी लामो समय जिदानको पहिलो रोजाइको खेलाडी रहने अनुमान गरिएको छ । यद्दपी युनाइटेडले डे हेयालाई छाड्न तयार नभएसम्म भने क्रुस युनाइटेड पुग्ने लगभग असम्भव रहेको बताइएको छ ।
