टेक्सस (एजेन्सी)– रोमेलु लुकाकुले खेल जीवनको उच्च फर्ममा म्यानचेस्टर युनाइटेड जानुलाई उपयुक्त कदम भएको युवा फरवार्ड मार्कुस रासफोर्डले बताएका छन् । फरवार्ड लाइनमा बेल्जियन लुकाकुसँगको साझेदारीलाई लिएर पनि रासफोर्ड उत्साहित देखिएका छन् ।
प्रशिक्षमका दौरान रोमेलु लुकाकु (दायाँ) र मार्कुस रासफोर्ड ।
लुकाकु जुलाईको सुरुआतमा एभर्टनबाट युनाइटेड पुगेका थिए । जोजे माउरिन्होको प्रशिक्षणमा अमेरिकामा दुई दिनअघि लुकाुकले रियल साल्ट लेकविरुद्ध गोलका खाता पनि खोलिसकेका छन् । गत सिजन २५ गोल गरेका २४ वर्षे लुकाकु सहि समयमा युनाइटेड आबद्ध भएको रासफोर्डको भनाई छ । रासफोर्डले चेल्सीका पूर्व फरवार्डसँग आफुले पनि धेरै सिक्न पाउने विश्वास लिएका छन् ।
लुकाकु युनाइडेट पुगेका विषयमा स्काई स्पोर्टसको प्रश्नमा रासफोर्डले भने,‘पछिल्लो तीन चार बर्षमा उनले धेरै गोल गरेका छन् । उच्च फर्म रहँदै अहिले उनी यहाँ आउनु सकारात्मक कदम हो । मलाई लाग्छ उनी खेल जीवनको उच्चदम विन्दुमा छन्, यो सुरुवा सहि समयमा भएको छ ।’
युनाइटेडको एकेडेमीका उत्पादन १९ वर्षे रासफोर्डले लुकाकुका बारेमा थपे,‘मलाई लाग्छ उनीबाट मैले धेरै सिक्नेछु । त्यसै हामीले सँगै खेल्दा पनि धेरै सिक्न सक्छौं । यसले मैदानमा पनि सहज हुनेछ ।’ युनाइटेडले प्रि सिजन टुरमा रहेको अर्को सहरी प्रतिद्वन्द्वि म्यानचेस्टर सिटीसँग आज मैत्रीपूर्ण खेल खेल्दैछ । माउरिन्होले सिटीविरुद्ध लुकाकु र रासफोर्डलाई अग्रपक्तिको जिम्मा दिएर प्ररिक्षण गर्ने सम्भावना रहेको आकंलन गरिएको छ ।
