एजेन्सी – बार्सिलोना एवं स्पेनिस राष्ट्रिय टोलीका पूर्व खेलाडी जाभी हर्नान्डेजले लियोनेल मेस्सीलाई फुटबल खेल्ने मेसिनको संज्ञा दिएका छन्। सन् २०१५मा बार्सिलोना छाड्नुअघि सम्म जाभीले मेस्सीसँगै बार्सिलोनाबाट खेलेका थिए।
३० वर्षका मेस्सीलाई विश्वकै सर्वोत्कृष्ट फुटबलर मान्दै आएका जाभीले उनले कुनैपनि खेलाडीको भूमिकामा खेल्न सक्ने पनि बताए। ‘मेस्सी साँच्चै नै अद्भुत छन्। उनले आफु खेल्ने शैलीसँगै मेरो, इनिएस्टा र बुस्केट्सको शैलीमा पनि खेल्न सक्छन। मलाई लाग्छ उनि फुटबल खेल्न बनेका मेसिन हुन् जसमा कुर्कुच्चामा भएको रबरमा बल अड्किन्छ।’
मेस्सीले बार्सिलोनासँग रहेर ८ पटक स्पेनिस लिग उपाधि र ३ पटक च्याम्पियन्स लिग उपाधि जितिसकेका छन्। केहि समय अघिमात्र सन् २०२१सम्मको लागि नयाँ सम्झौता गरेका मेस्सीले अझै धेरै उपाधि जित्ने लक्ष्य राखेका छन्। नयाँ सम्झौता नुसार उनले साताको ५ लाख पाउण्ड कमाउने गरेका छन्।
देशको लागि खेलेको अन्तर्राष्ट्रिय प्रतियोगितामा भने मेस्सीले राष्ट्रिय टोलीलाई उपाधि दिलाउन नसक्नु सधैं प्रश्न रहँदै आएको छ। यस्तो स्थितिमा उनले सन् २०१८को विश्वकप फुटबललाई आफ्नो मुख्य लक्ष्य लिंदै आएका छन्।
