एजेन्सी – इन्टरनेसनल च्याम्पियन्स कप अन्तर्गत संयुक्त राज्य अमेरिकाको टेक्सास सहरमा भएको खेलमा म्यानचेस्टर युनाइटेडले म्यानचेस्टर सिटिलाई २-०ले पराजित गरेको छ। खेलको दुवै गोल पहिलो हाफमा भएको थियो।
खेलको ३७औं मिनेटमा म्यानचेस्टर युनाइटेडमा भर्खरै भित्रिएका फरवार्ड रोमेलु लुकाकुले गोल गरेका थिए। उनले गोलरक्षक एडरसनलाई छक्याउँदै खाली पोष्टमा गोल गरेका थिए। त्यसको २ मिनेटमै अर्का फरवार्ड मार्कस र्यासफर्डले युनाइटेडको अग्रता दोब्बर पारे। उनले हेनरिक मिखीतार्यानको पासमा बक्सको दायाँतिर बाट गोल गरेका थिए।
दुवै टोलीले आफ्ना मुख्य खेलाडीलाई मैदानमा उतारेका थिए। पहिलोपटक बेलायतबाहिर खेलिएको म्यानचेस्टर डर्बीमा उल्लेख्य संख्यामा समर्थकहरुको उपस्थिति रहेको थियो। म्यानचेस्टर सिटीका लागि काइल वाल्करले यसै खेलमार्फत डेब्यु गरेका थिए।
युनाइटेडले आगामी मंगलबार अर्को मैत्रीपूर्ण खेलमा रियल म्याड्रिडको सामना गर्दैछ।
