काठमाडौं (हाम्रो खेलकुद) – नेपाली राष्ट्रिय फुटबल टोलीका मिडफिल्डर रोहित चन्द लगातार दोस्रो पटक इन्डोनेसिया लिगा १ को उत्कृष्ट ११ मा छानिएका छन् । लिगा १ मा गरेको प्रदर्शनको आधारमा रोहित प्रतिष्ठित वेबसाइट गोल डट कमले घोषणा गरेको १४ औं र १५ औं साताका लागि उत्कृष्ट ११ मा छनोट भएका हुन् ।

यसअघि १३ औं साताको उत्कृष्टमा पनि उनी उत्कृष्ट ११ मा समेटिएका थिए । यो सिजन पर्सिजा पुगेयता उनी उत्कृष्ट ११ मा परेको त्यो पहिलो पटक थियो । लिगा १ मा २० टोलीको सहभागिता छ । साउन १ गते रोहितकै गोलमा पर्सिजा जकार्ताले पुसामानिया बोर्निओलाई १–० ले हराएको थियो ।

त्यसअघि रोहितको टोलीले ग्रिसिक युनाइटेडसँग १–१ को बराबरी खेलेको थियो । सुरुआतमा केहि साता खराब प्रदर्शनका कारण दबाबमा रहेको पर्सिजा पछिल्ला साताहरुमा भने उच्च प्रदर्शन गर्दै आइरहेको छ ।

रोहितको टोली अंक तालिकाको पाँचौ स्थानमा पुगेको छ । पर्सिजाले १५ खेलमा ६ जित, ६ बराबरी र ३ हारसहित २४ अंक जोडेको छ । शीर्षस्थानमा रहेको पीएसएमको २७ अंक रहेको छ । बुधबार मात्र पर्सिजाले प्रि सिजनका लागि इन्डोनेसिया भ्रमणमा रहेको स्पेनिस क्लब इस्पानियोलसँग मैत्रीपूर्ण खेल खेलेको थियो । रोहितले अन्तिम १२ मिनेट खेलेको उक्त खेलमा पर्सिजा ७–० ले पराजित भएको थियो ।

चोटका कारण झन्डै एक बर्ष मैदान बाहिर रहेर गत बर्षमा उनी लक्ष्मी हुन्डाई मनाङ मस्र्याङ्दीमार्फत फुटबलमा फर्केका थिए । चोटबाट फर्केपछि राष्ट्रिय टोलीमा समेत पुनरागमन गर्दै रोहितले एसियन कप छनोटमा फिलिपिन्स र यमनविरुद्ध खेलिसकेका छन्। मनाङबाट खेल्दा खेल्दै उनी पर्सिजामा आबद्ध भएका थिए ।