म्यानेस्टर (एजेन्सी)– म्यानेचेस्टर युनाइटेडका प्रशिक्षक जोसे मोउरिन्होले यो सिजन बायर्न म्युनिखबाट रेनाटो सान्चेसलाई भित्र्याउने सम्भावना बढेको छ । एक सिजन मात्र बायर्न बिताएका सान्चेस पनि क्लब छोड्न चाहिरहेको बुझिएको छ ।
सन् २०१६ मा उच्च प्रदर्शन गर्दै गोल्डेन ब्वाइ अवार्ड जितेका पोर्चुगलका युवा प्रतिभा ३० मिलियन युरोमा बेनफिकाबाट बायर्न पुगेका थिए । तर, बायर्नमा उनको यात्रा राम्रो हुन सकेन । उनले बुन्डेसलिगामा १७ खेल खेल्ने मौका पाए । त्यसमा पनि ६ खेलमा मात्र उनी पहिलो ११ मा पर्न सफल भए ।
बायर्नले ४० मिलियन युरोको प्रस्ताव आए सान्चेसलाई बेच्न तयार रहेको र त्यसमा युनाइटेडले इच्छा देखाएको गार्जियनले आफ्नो समाचारमा उल्लेख गरेको छ । तर युनाइटेडले सान्चेसका लागि एसी मिलानसँग प्रतिस्पर्धा गर्नुपर्ने हुन सक्छ ।
नयाँ टोली बनाउने तयारीमा जुटेको मिलानका नजरमा सान्चेस पनि छन् । युनाइेडले यो सिजन बेनफिकाबाट भिक्टोर लेन्डिलोफ र एभर्टनबाट रोमेलु लुकाकुलाई भित्राउँदा १ सय मिलियन भन्दा बढी खर्च गरिसकेको छ ।
