हंगकंग (एजेन्सी) – प्रिमियर लिग एसिया ट्रफिको फाइनलमा ब्राजिलियन मिडफिल्डर फिलिपे कौटिन्होको उत्कृष्ट गोलमा लिभरपुलले लेस्टर सिटीलाई २-१ ले हराएको छ। एक गोलले पछि पारेको स्थितिलाई उल्टाउँदै लिभरपुलले खेलमा जित हासिल गरेको हो।
इस्लाम स्लिमानीको गोलमा लेस्टर सिटीले खेलको पहिलो हाफको १२औं मिनेटमा अग्रता लिएको थियो। तर २०औं मिनेटमा लिभरपुलका नयाँ खेलाडी मोहोमद सलाहले कौटिन्होको उत्कृष्ट पासको सदुपयोग गर्दै गोल गरेपछि खेल बराबरीमा आएको थियो। कौटिन्होले डी बक्स बाहिरबाट निकालेको पासमा सलाहले हेडर मार्फत गोल गरेका थिए।
लिभरपुलको बराबरीमा असिस्ट मार्फत योगदान दिलाएका ब्राजिलियनले ४४औं मिनेटमा उत्कृष्ट गोल गर्दै लिभरपुललाई अग्रता दिलाए । डि-बक्सको किनाराबाट गरेको कौटिन्होको प्रहारले लेस्टरका किपर क्यास्पर स्माईकललाई कुनै मौका दिएन।
कौटिन्होकालागि बार्सिलोनाबाट करिब ७० मिलियन पाउण्डको प्रस्ताव आएपनि लिभरपुलले आफ्नु मुख्य खेलाडिलाई कुनै हालतमा नबेच्ने जानकारी दिएको छ। उनको सम्झौतामा कुनै रिलिज क्लज नभएका कारण लिभरपुलको अनुमति बिना क्लब छाड्न पाउने छैनन्। यसअघि कौटिन्होले पनि लिभरपुलमा आफ्नु भविश्य समर्पित गर्ने बाचा गरिसकेका छन् ।
हाइलाइट
