सिंगापुर (एजेन्सी)– छ घन्टाको हवाईयात्रामार्फत बेजिङबाट सिंगापुर पुगेको चेल्सीको टोलीका खेलाडीसँग क्लबमा नयाँ स्ट्राइकर अल्भारो मोराटाको पहिलो पटक  भेट हुने भएको छ । बर्ड नेस्ट रंगशालामा आर्सनलसँग शनिबारको खेलमा घाइते भएका पेद्रो लन्डन फर्केपछि अब प्रशिक्षक एन्टोनियो कोन्टेसँग पहिलो रोजाईको स्ट्राइकर छैन ।

सिंगापुर पुगेपछि अटोग्राफ दिदै चेल्सीका अल्भारो मोराटा ।

त्यसको मतलब पछिल्लो सिजनका मुख्य आक्रामण सम्हालेका खेलाडी कोन्टेसँग छैनन् । इडन हाजार्ड चोटग्रस्त छन् । बेल्जियमको अभ्यासका दौरान घाइते भएका हाजार्ड सेप्टेम्बर अन्त्यमा मात्र फिट हुने अपेक्षागरिएको छ । अर्का स्ट्राइकर डिएगो कोस्ट भ्रणमा सामेल छैनन् । उनी एट्लेटिको म्याड्रिड फर्कने तयारीमा रहेको बताइएको छ । तर, प्रिमियर लिग च्याम्पियन चेल्सीका लागि मोराटाको आगमनले राहत पुग्ने अनुमान गरिएको छ ।

रियल म्याड्रिडबाट शुक्रबारमात्र ७० मिलियन युरो भन्दा बढीमा चेल्सीमा आबद्ध भएका थिए । उनी इङ्ल्यान्डबाट सोझै सिंगापुर पुगेका छन् । अब यो साता चेल्सीले बायर्न म्युनिख, इन्टर मिलानसँग इन्टरनेसनल च्याम्पियन्स कपमा प्रतिस्पर्धा गर्नेछ । सम्भवत मोराटा ती मध्ये कुनै खेलमार्फत चेल्सीका लागि डेब्यू गर्ने सम्भावना छ ।

स्पेनका अन्तर्राष्ट्रिय मोराटा विलियन, मिसी बासुआई वा जेरेमी बोगासँगै उत्रने छन् । बासुआइको दुई गोल र विलियनको एक गोलको मद्दतमा शनिबार चेल्सीले आर्सनललाई ३–० ले हराएको थियो । सिंगापुरमा दुई मैत्रीपूर्ण खेलपछि चेल्सी एफए कम्युनिटी सिल्डको तयारीका लागि इङ्ल्यान्ड फर्कनेछ । कम्युनिटी सिल्डमा चेल्सी र आर्सनलबी अगस्ट ६ मा प्रतिस्पर्धा हुनेछ ।

सिंगापुर पुगेका चेल्सीका डेभिड लुइज (दायाँ)।