एजेन्सी – म्यानचेस्टर सिटिले रियल म्याड्रिडका डिफेन्डर ड्यानीलोलाई २७ मिलियन पाउण्ड खर्चेर भित्र्याएको छ। सिटिले गरेको प्रस्ताव रियलले स्वीकार गरेपछि ड्यानीलोले ५ वर्षको सम्झौता गरेर सिटि आएका हुन्।

सन् २०१५मा रियल म्याड्रिड आएका ड्यानीलोले रियलमा रहेर राम्रो प्रदर्शन गर्न नसकेपछि क्लबले उनलाई बिक्रि गर्ने सोच बनाएको थियो। २ सिजनमा उन्ला ४१ खेल खेल्दै ३ गोल गरेका थिए। सिजनको अन्त्यतिर उनि कर्भाजल र नाचोपछिको रोजाईको खेलाडी बनेपछि प्रशिक्षक जिदानले उनलाई प्रयोग गरेका थिएनन्।

२६ वर्षीय डिफेन्डर ड्यानीलोले भोलीबाट नै प्रशिक्षणमा आबद्ध हुनेछन्। उनले लेफ्ट र राइट दुवैतर्फ खेल्न सक्ने हुनाले क्लबले उनलाई भित्र्याएको बुझिएको छ। ड्यानीलोले क्लबमा जोडिन पाउँदा एकदम खुशी व्यक्त गरे। यसै सिजन सिटिले आफ्ना ४ फुलब्याकलाई क्लब छोड्न खुला छाडेको थियो।

सिटिले यसअघिनै ५० मिलियन पाउण्ड खर्चेर काइल वाल्करलाई भित्र्याएपनि प्रशिक्षक गुआर्डीओलाले भने आफ्नो टोलीलाई बलियो बनाउन कुनै कसर नछाड्ने बताउँदै आएका थिए। उनले मोनाकोबाट लेफ्ट ब्याक बेन्जामिन मेन्डीलाई पनि भित्र्याउने प्रयास गरिरहेको बुझिएको छ।

रियल म्याड्रिड र म्यानचेस्टर सिटि आगामी बुधबार हुने खेलमा आमने सामने हुँदैछन्। दुवै क्लब अहिले अमेरिकामा रहेर प्रि सिजनको खेल एवं प्रशिक्षणमा व्यस्त छन्। सिटीले यसै साता रोमाको प्रस्तावलाई स्वीकार्दै डिफेन्डर एलेक्जेन्डर कोलारोभलाई बिक्रि गरेको छ भने फरवार्ड विल्फ्रिड बोनी र फबियान डेल्फ पनि क्लब छाड्ने तयारीमा छन्।