काठमाडौं (हाम्रो खेलकुद) – रुस्लान थ्री स्टार क्लबलाई क्षतिपूर्ति दिने विषयमा लगभग सहमति भएपनि कुन प्रक्रियाबाट दिने र दोषी माथि कारवाही पनि गरिनु पर्ने आवाज उठेपछि अखिल नेपाल फुटबल संघ (एन्फा) को बुधबारको बैठक विना निष्कर्ष टुंगिएको छ ।

पहिलो चरण पार गरेपनि एन्फाको गल्तिका कारण अन्तिम चरण खेल्न नपाएको थ्री स्टारले दोषीलाई कारवाही र ६ करोड रुपैयाँ क्षतिपूर्ति माग गरेको छ महिना भन्दा लामो समय एन्फा कुनै निर्णयमा पुग्न सकेको छैन । बुधबारको बैठकमा थ्री स्टारलाई अन्याय परेकोमा सबै एकदम जस्तै देखिएपनि दोषीलाई समेत कारवाही गरिनु पर्ने अवाज चर्को रुपमा उठेको थियो ।

दोषी माथि कारवाही गरेपछि थ्री स्टारलाई क्षतिपूर्ति नदिदा हुन्छ भन्ने तर्क पनि बैठकमा उठेको बताइएको छ । ‘व्यापक छलफल भयो । केही विषयमा फरक मत रह्यो । थ्री स्टारको विषय बाहेक अन्य एजेन्डामा सहमति भइसकेको छ ’ एन्फाका प्रमुख कार्यकारी अधिकृत इन्द्रमान तुलाधारले भने, ‘बैठक लामो समय चलेकोले अध्यक्षले भोली पुनः बस्ने गरि आजलाई बैठक सकिएको छ । सम्भव भोली थ्री स्टारको विषयमा टुंगाएर सबै निर्णय सार्वजनिक गर्नेछौं ।’

मनार्थ अध्यक्ष तासी घले, उपाध्यक्षद्वय किशोर राई, वीरबहादुर खड्का, सदस्यहरु बसन्त अर्याल र पंकज नेम्बाङ थ्री स्टारलाई क्षतिपूर्ति दिनुपर्नेसँगै दोषीलाई पनि कारवाही गर्नुपर्नेमा जोड दिए । खड्का संयोजक रहेको छानविन समितिले थ्री स्टारले खेल्न नपाउनुमा एन्फा महासचिव धिरेन्द्र प्रधान र वरिष्ठ अधिकृत गोकुल थापालाई मुख्य दोषी मान्दै नसियत दिनुपर्ने प्रतिवेदन बुझाएको थियो । संयोजकको नाताले जस्तो सिफरिस गरेको भएपनि उपाध्यक्षको हैसियतमा कारवाही हुनु पर्ने खड्काले जीकिर गरेका थिए ।

अर्का सदस्य प्रकाश पंगेनी, गणेश भट्टराई, किशोर राईले भने कार्यसमितिले मात्र थ्री स्टारको विषय टुंगाउन नसक्ने भएकोले साधारण सभामा लानु पर्ने विचार राखेका थिए । तर, एन्फा अध्यक्ष नरेन्द्र श्रेष्ठ, उपाध्यक्ष मणी कुँवरलगायत अन्य सदस्य भने कार्यसमितिले नै सबै विषय टुंगाउनु पर्ने पक्षमा रहेको सिइओ तुलाधरले बताए । तुलाधरका अनुसार छ महिना अघि एन्फा कार्यसमितिले अध्यक्ष श्रेष्ठको नेतृत्वमा ४ जनालाई थ्री स्टारसँग वार्ता गरेकाले समितिले दिएको सुझावलाई मानेर अघि बढ्नु पर्ने बताए ।

‘अध्यक्ष, उपाध्यक्ष कुँवर, महासचिव ज्यू र म भएको समितिलाई जिम्मा दिएअनुसार हामीले थ्री स्टारसँग वार्ता गरेका थियौं ’एन्फा प्रवक्ता समेत तुलाधरले भने, ‘समितिले दिएको सुझावलाई कार्यसमितिले सम्बोधन त गर्नै पर्यो । ’वार्तामा थ्री स्टारलाई १ करोड ५० लाख रुपैयाँ दिने सहमति भएको बैठकमा जानकारी दियौं ।

लिग यसै बर्षमा गर्नु पर्ने विषयमा सबैले सहमति जनाएपनि मिति भने बैठकमा तय हुन सकेन । थ्री स्टारकै विषयले गर्दा कुनै पनि अन्य सहमति भएका विषय पनि निर्णय भएका छैनन् । एन्फा बैठक चलिरहँदा थ्री स्टारका कार्यवहाक अध्यक्ष अरुणमान जोशी, अन्य पदाधिकारी र क्लबका शुभचिन्तक गरि भन्डै २५ जना एन्फा परिसर बाहिर निर्णय कुरेर बसेका थिए ।