लास एन्जेलस (एजेन्सी) – प्रि सिजन अन्तर्गत इन्टरनेसनल च्याम्पियन्स कप (आइसीसी) अन्तर्गतको मैत्रीपूर्ण खेलमा इङ्गलिस क्लब म्यानचेस्टर सिटीले स्पेनिस च्याम्पियन रियल म्याड्रिडलाई ४-१ले पराजित गरेको छ।

पहिलो हाफ गोलरहित रहेको खेलमा सिटीले दोश्रो हाफमा ४ गोल गरेको थियो। खेलको ५२औं मिनेटमा निकोलस ओटामेन्डीले सिटिलाई सुरुवाती अग्रता दिलाएका थिए। गोलरक्षक किको कसिल्लाले कर्नरको हेडरबाट आएको बल बचाएपनि रिबाउन्डमा ओटामेन्डीले सहजै गोल गरेका थिए। सिटीले ५९औं मिनेटमा रहिम स्टरलिङको गोलमा अग्रता दोब्बर पार्यो। केभिन डे ब्रुएनले मिलाइदिएको पासमा स्टरलिङले पहिलो बारमा गोलरक्षकलाई कुनै मौका नदिई गोल गरेका थिए।

खेलको ६७औं मिनेटमा जोन स्टोन्सले सिटीलाई ३-०को स्थितिमा पुर्याएका थिए। उनले बक्सभित्र रहेर डे ब्रुएनको पासलाई पहिलो टचमै गोल गरेका थिए। सिटीले ८२औं मिनेटमा ब्राहिम डियाजको गोलसँगै खेलमा ४-०को अग्रता बनायो। डियाजले डी बक्स बाहिरबाट गरेको प्रहार सिधै गोलमा परिणत भएको थियो।

रियलका लागि ८९औं मिनेटमा ओस्कार रोड्रीग्वेजले सान्तवना गोल गरेका थिए। उनले करिब ३० यार्ड टाढाबाट गरेको प्रहर टप कर्नरमा छिरेको थियो। यससँगै रियलले प्रि सिजनको सुरुवाती दुइ खेलमा हार व्येहोरेको छ। यसअघी रियल म्यानचेस्टर युनाइटेडसँग पेनाल्टीमा पराजित भएको थियो।