लस एन्जल्स (एजेन्सी)– रियल म्याड्रिडका प्रशिक्षक जिनेदिन जिदानले गेराथ बेललाई लिएर म्यानचेस्टर युनाइटेडलाई चनाखो रहन संकेत गरेका छन् । जिदानले बेललाई रोक्न आफु सफल नरहन सक्ने खुलासा गरेका छन् ।
जिदानको भनाईसँगै रियलमा बेलको भविष्य अन्योलमा रहेको अनुमान गरिएको छ । युरोपियन च्याम्पियन रियल १ सय ६० मिलियन युरोको विश्व कीर्तिमानी रकमसहित मोनाकाका स्ट्राइकर केलियन बाप्पे भित्राउन प्रयास रहेको बताएको छ ।
बाप्पेको आगमन भएको खण्डमा जिदानले क्रिस्टिायाने रोनाल्डो, करिम बेन्जिमा र बेल मध्ये एकलाई गुमाउनु पर्ने हुन सक्छ । बाप्पेलाई ठाँउमा अर्को एउटा स्टारले त्यसको मार खेप्नु पर्ने हुन सक्छ । यी तीन मध्ये वेल्सका स्टार बेलकै क्लब छोड्ने सम्भावना बढी रहन्छ ।
म्यानचेस्टर सिटीसँग बिहीबार भएको खेलपछि क्लबको अबस्थाका बारेमा सोधिएको प्रश्नमा जवाफ दिदै जिदानले भने,‘मलाई लाग्छ बिबिसी (बेल, बेन्जिमा र क्रिस्टियानो) यो सिजन क्लबमै रहनेछन् । म सबै यही रहेको हेर्न चाहन्छु । तर पनि अगस्ट ३१ सम्म जे पनि हुन सक्छ ।’
जोसे माउरिन्हाले अझै एक जना खेलाडी भित्राउन चाहेको बताउँदै आएका छन् । उनले ४८ मिलियन पाउन्डमा इन्टर मिलानका इभान पेरिसिकलाई ल्याउन चाहेको बताइएको छ ।
अमेरिकामा रियल र युनाइटेडबीचको खेलअघि माउरिन्होले बेललाई भनेको थिए, ‘तिमिले म सँग कुरा नगरेका कारण तिमिलिाई किन्न सक्दिन ।’ २८ वर्षे बेल रियलमै खुसी रहेको बताइएपनि बाप्पेको आगमनको उनलाई बेच्न क्लब तयार हुन सक्ने अनुमान गरिएको छ ।
