काठमाडौँ (हाम्रो खेलकुद) – इन्डोनेसियाको लिग वन क्लब पर्सिजा जकार्ताबाट व्यवसायिक फुटबल खेल्दै आएका नेपाली राष्ट्रिय टोलीका मिडफिल्डर रोहित चन्दले शनिबार भएको भायांकारा सुरबयाविरुद्धको खेलमा सुरुवाती ११मा नाम भएपनि खेलमा सहभागिता जनाएनन्। वार्मअपको दौरान चोट लागेको र त्यसको विस्तृत विवरण भोलीमात्र थाहा हुने रोहितले हाम्रो खेलकुद डट कमलाई जानकारी दिए।
रोहितको अनुपस्थितिमा टोलीले अन्तिम मिनेटमा गोल गर्दै खेल १-०ले जितेको थियो। रोहितले आफ्नो चोट सामान्य लागेको तर विस्तृत विवरण भने भोलीमात्र आउने बताए। ‘वार्म अपको दौरान चोट लागेको हो। अस्तिको खेलमा कतिबेला एंकलमा सानो चोट लागेको रहेछ, आज वार्म अप गर्दा त्यहि ठाउँमा बल्झियो। भोली डाक्टरलाई देखाएपछि विस्तृत विवरण आउनेछ।’
सेप्टेम्बर ५मा हुने नेपाल र ताजिकिस्तानको खेलका लागि नेपाली राष्ट्रिय टोली अभ्यासका लागि जापान जाने कार्यक्रममा यसअघि रोहितको सहभागिता नहुने पक्का भएको थियो। उनको टोलीले अब अर्को आइतबार बारितो पुतेराको सामना गर्नेछ।
