फ्रान्स (एजेन्सी) – पेरिस सेन्ट जर्मेन (पिएसजी)ले अघिल्लो सिजनको लिग वन उपाधि विजेता एएस मोनाकोलाई २-१ले पराजित गर्दै फ्रान्सेली लिग सिजनको सुरुवातमा आयोजना हुने फ्रेन्च सुपर कपको उपाधि जितेको छ। पिएसजीको जितमा भर्खरै क्लबमा आबद्ध भएका डिफेन्डर ड्यानी आल्भेस नायक रहे।
आल्भेसले १ गोल र १ असिस्ट प्रदान गरेपछि खेलमा पछाडी परेको पिएसजीले उपाधि जितेको थियो। मोनाकोले खेलको ३०औं मिनेटमा जिब्रिल सिडिबेको गोलमा अग्रता लिएको थियो। उनले मिडफिल्डर युरी टिलेमान्सको पासलाई सदुपयोग गर्दै गोल गरेका थिए। पहिलो हाफमा १-०को अग्रता लिएको मोनाकोका लागि युवा फरवार्ड किलियन बाप्पेले आशातीत प्रदर्शन गर्न सकेनन्।
फ्रिकिक मार्फत गोल गर्दै ड्यानी आल्भेस
दोश्रो हाफको ५१औं मिनेटमा ड्यानी आल्भेसले फ्रिकिक मार्फत गोल गर्दै खेललाई बराबरीमा ल्याएका थिए। त्यसको १२ मिनेटपछि आल्भेसको पासमा एड्रीएन राबिओटले गोल गरेपछि पिएसजीले खेलमा अग्रता लिएको थियो। खेलमा थप गोल हुन नसकेपछि पिएसजीले सिजनको सुरुवातमै उपाधि जितेको छ।
म्याड्रिड जाने हल्लाले गर्दा केहि दबाबमा परेका बाप्पेले राम्रो खेल्न नसकेपछि प्रशिक्षकले उनलाई दोश्रो हाफमा परिवर्तन गरेका थिए। यता बार्सिलोनाको नजरमा परेका मार्को भेर्राट्टीले भने उत्कृष्ट प्रदर्शन गरे।
