बुकारेस्ट (एजेन्सी) – ब्राजिलियन राष्ट्रिय फुटबल टोली एवं बार्सिलोनाका पूर्व फरवार्ड रिभाल्डोका छोरा रिभाल्डिन्होले युरोपा लिगमा उत्कृष्ट गोल गरेका छन्। रोमानियाको शीर्ष डिभिजन क्लब डिनामो बुकारेस्टबाट व्यवसायिक फुटबल खेल्दै आएका उनले स्पेनिस क्लब एथलेटिक बिलबाओ विरुद्ध गोल गरेका हुन्।
फाइल तस्बिर
रिभाल्डिन्होले घरेलु टोली डिनामो १-०ले पछि परेको स्थितिमा ३० यार्ड टाढाबाट गरेको प्रहार गोलमा परिणत भएको थियो। दर्शक दिर्घामा रहेका रिभाल्डो उनको गोलमा एकदम हर्षीत देखिएका थिए। रिभाल्डिन्होको गोलको मद्दतले डिनामोले खेल १-१को बराबरीमा सकेको थियो।
२२ वर्षीय रिभाल्डिन्हो यसअघि ब्राजिलियन टोली इन्टरनासिओनालमा आबद्ध भएपनि त्यहाँ खेल्न पाएका थिएनन्। उनी यसै वर्ष डिनामोसँग आबद्ध भएका हुन्। उनले टोलीका लागि ३ गोल गरिसकेका छन्। दोश्रो लेगको खेल अर्को साता बिलबाओको घरेलु मैदान सान मामेसमा हुनेछ।
मोगी मिरिमका लागि एकै खेलमा गोल गरेपछि खुशी मनाउँदै
यसअघि सन् २०१५मा ब्राजीलको दोश्रो श्रेणीको लिगमा दुवै बाबुछोराले मोगी मिरिम नामक क्लबबाट खेलेका थिए। लिगको एक खेलमा दुवैजनाले गोल गरेर अनौठो कीर्तिमान आफ्नो नाम लेखाएका थिए। रिभाल्डिन्होले अहिलेसम्म सिनियर करियरमा ८६ खेलमा १९ गोल गरेका छन्।
