मिलान (एजेन्सी) – ज्लाटान इब्राहिमोभिच चोटमुक्त भएर फर्कदा फेरी एक पटक क्लबमा भित्राउन एसी मिलानले म्याचेस्टर युनाइटेडसँग प्रतिस्पर्धा गर्ने सम्भावना बढेको छ । इब्राहिमोभिच घुँडाको चोट ठिक हुने क्रममा रहेका छन् ।
मिलानमा हुँदा इब्राहिमोभिच ।
नयाँ बर्षसम्म मैदान बाहिर रहने अनुमान गरिएको इब्राहिमोभिचलाई जनवरीको सरुवामा भित्राउने एसी मिलानको योजना रहेको सञ्चारमाध्यमहरुले दाबी गरेका छन् । मिलानले अहिले टोली पूर्न निर्माणमा खर्च गरिरहेको छ ।
इटालियन पत्रिका टुटोस्पोर्टसले इब्राहिमाभिच पनि मिलान फर्कन चाहेको उल्लेख गरेको छ । ३५ वर्षे स्वीडिस फरवार्डले यसअघि दुई सिजन मिलानमा बिताइसकेका छन् । सन् २०१० मा लोनमा मिलान पुगेका उनी अर्को बर्ष त्यहाँका स्थायी खेलाडी बनेका थिए । उनले मिलानबाट ७७ खेलमा ५१ गोल गरेका थिए ।
तर, इब्राहिमोभिचको यात्रा त्यहाँ लामो हुन सकेन । २०१२ मा १५.७ मिलियन युरोमा उनी फ्रेन्च टोली पेरिस सेन्ट जर्मेन (पिएसजी) मा आबद्ध भए । पिएजसीमा उनको खेल जीवनमा निकै उचाई लियो । त्यहाँको लामो बसाईपछि उनी पछिल्लो सिजन युनाइटेड पुगेका थिए । इब्राहिमोभिच पनि चीनियाँ मालिक रहेको मिलानमा आकर्षित रहेको अनुमान गरिएको छ ।
