अख्तियार दुरुपयोग अनुसन्धान आयोगले गणेश थापाविरुद्धको भ्रष्टाचार उजुरी गत बर्ष तामेलीमा राख्ने गरेको निर्णयको बचाउ गरेको छ ।
सार्वजनिक लेखा समितिले एन्फामा ५८ करोड रुपैयाँ भन्दा बढी भ्रष्टाचार भएको ठहर गर्दै थप छानविनका लागि अख्तियारलाई निर्देशन दिएपनि भ्रष्टाचार गरेको पुष्टि हुन नसकेको भन्दै अख्तियारले फागुनमा उजुरी तामेलीमा राखेको थियो ।
फुटबलको सर्वोच्च निकाय फिफाको इथिक्स कमिटीले सोमबार भ्रष्टाचारको अभियोगमा थापालाई १० बर्षको प्रतिबन्ध र झन्डै २१ लाख रुपैयाँ जरिवाना गरेपछि अख्तियार विवादमा तानिएको थियो ।
फिफाले थापाको अनियमितता देख्ने तर अख्तियारले नदेख्दै भन्दै एन्फासँग असन्तुष्ट फुटबलकर्मीले पनि आलोचना गर्दै आएका छन् । निर्णयको बचाउन गर्ने क्रममा थापालाई फिफाले फरक प्रंसगमा कारवाही गरेको जनाउँदै अख्तियारका सह सचिव एवंम प्रवक्ताले शुक्रबार विज्ञप्तीमार्फत भनेका छन्,‘फिफाद्वारा अलग सन्दर्भ र विषयवस्तु माथि केन्द्रित रहेर थापा विरुद्ध गरिएको खेल गतिविधि माथिको वन्देजात्मक एवं जरिवाना सहितको कारवाही प्रसंगमा अनावश्यक रुपमा आयोगको समेत नाम जोडेर समाचार प्रकाशित र प्रसारित गरिएको कुरा प्रति आयोग खेद व्यक्त गर्दछ ।’
फिफाको इथिक्स कमिटीले सन् २००९ र २०११ मा भएको फिफा कार्यसमिति निर्वाचनमा एसियाली प्रतिनिधि छान्ने क्रममा थापाले ठूलो रकम घुसका रूपमा लिएको अभियोग लगाएको छ । लेखा समितिले विभिन्न १६ बुदामा छानविन गर्न दिएको विषयमा गम्भिर अनुसन्धान गरेको दाबी गर्दै प्रवक्ता पुस्करले अनियमितता पुष्टि हुन नसकेको दोहोराएका छन् । तथापी उनले तामेली निर्णय अन्तिम निर्णय नभएकाले प्रमाणका आधारमा तामेलीलाई पुन छानविन गर्न सकिने उल्लेख गरेका छन् ।
एएफसीका पूर्व अध्यक्ष मोहम्मद विन हमामबाट थापाका छोरा गौरवको बैंक खातामा प्राप्त १ लाख डलरको विषय छानविन गर्ने निकाय अख्तियार नभएको पनि पुस्करले विज्ञप्तीमा उल्लेख गरेका छन् । उनले थपेका छन्,‘ आयोगले १ लाख डलरका विषयमा सम्पत्ति शुद्धिकरण विभागलार्य आवश्यक कारवाही गर्न लेखि पठाएको थियो ।’ अख्तियारले फिफाले थापामाथि गरेको कारवाही विषयमा प्रमाण संकलन सुरु गरेको उल्लेख गर्दै क्षेत्राधिकार भित्र परे अनुसन्धान अघि बढाउने समेत जनाएको छ ।
