इक्वेडर (एजेन्सी) – दक्षिण अमेरिकी विश्वकप छनोटको अन्तिम खेलका लागि अर्जेन्टिना इक्वेडर पुगेका छन् । अर्जेन्टिनाको टिमलाई त्यहाँको सुरक्षकर्मीले अत्यन्तै कडा सुरक्षकाबीच होटलमा लगेको थियो ।

दक्षिण अमेरिकी छनोटमा अर्जेन्टिनाको विश्वकप यात्रा निकै कठिन मोडमा रहेको छ । समुन्द्री सतहबाट ९ हजार फिट माथिको उचाईमा हुने खेलमा अर्जेन्टिना जितेमा कम से कम प्ले अफ मार्फत छनोट हुने सम्भावना जीवित राख्छ ।  तर बराबरी खेलेमा अर्जेन्टिनाले अन्य खेलमा निर्भर रहनु पर्नेछ । अर्जेन्टिना र इक्वेडरबीच बुधबार बिहान खेल हुुदैछ ।

दुई पटकको विश्व विजेता अर्जेन्टिनाले सन् १९७० देखि कुनै पनि विश्वकपमा बाहिर रहेको छैन । यसअघिको उपविजेता अर्जेन्टिना गएको बिहाबार भएको खेलमा पेरुसँग गोलरहित बराबरी रोकिएर अर्जेन्टिना थप समस्यामा परेको हो ।

दक्षिण अमेरिकी क्षेत्रबाट अहिलेसम्म ब्राजिलले मात्र विश्वकपमा स्थान सुरक्षित गरेको छ । १० राष्ट्र सहभागी यो क्षेत्रबाट चार टिमले सोझै विश्वकपमा स्थान बनाउने छ । पाँचौ स्थानमा अन्त्य गर्ने टिमले प्ले अफ मार्फत छनोट हुने सम्भावना बोक्नेछ ।

यस क्षेत्रबाट ब्राजिलसँगै उरुग्वेले विश्वकपमा केही हदसम्म यात्रा सुरक्षित गर्दा चिली, कोलम्बिया, पेरु, अर्जेन्टिना र पाराग्वेको विश्वकपमा पुग्ने उत्तिकै सम्भावना छ । यि टिमबीच मात्रै दुई अंकको फरक छ । यस्तोमा बुधबार बिहान १० टोलीले अन्तिम छनोट खेल खेल्दैछ । ब्राजिलले चिली, पाराग्वेले भेनेजुएला, पेरुले कोलम्बिया, उरुग्वेले बोलिभिया तथा इक्वेडरले अर्जेन्टिनाको सामना गर्दैछ ।

दक्षिण अमेरिकी क्षेत्रबाट पाँचौं स्थानमा रहने टोलीले प्ले–अफ खेल्न पाउनेछ । एक खेल बाँकी हुँदा अर्जेन्टिना भने छैटौं स्थानमा छ । अर्जेन्टिनाले कम्तिमा पाँचौं स्थानमा रहनका लागि इक्वेडरसँगको अन्तिम खेल अनिवार्य जित्नुपर्छ । यो खेल जित्दै पाँचौ स्थानमा अन्त्य गरेमा उसले विश्वकपमा स्थान बनाउनका लागि न्युजिल्याण्डसँग दुई लेगको प्ले–अफ खेल्नु पर्नेछ ।

त्यस्तै चौथो र पाँचौ स्थानका रहेका पेरू र कोलम्बियाविच बराबरीको नतिजा आएमा अर्जेन्टिनाले जितेमा चौथो स्थानमा रहँदै सोझै विश्वकपमा स्थान बनाउने छ । त्यस्तै चिलीले ब्राजिलसँग अंक गुमाउँदा पनि अर्जेन्टिनालाई फाइदा रहनेछ ।

पाँचौं स्थानमा रहेको पेरुले चौथौ स्थानको कोलम्बियासँगको अन्तिम खेलमा बराबरी गरेमा र अर्जेन्टिनाले इक्वेडरलाई हराउन नसकेमा लियोनेल मेस्सीको अर्जेन्टिना विश्वकपबाट बाहिरिने छ । तर गणितीय सम्भावनालाई आधार मान्ने हो भने अर्जेन्टिनाको तेस्रो हुनसक्ने सम्भावना पनि जीवित छ । त्यसकोलागि अर्जेन्टिनाले खेल जित्नु पर्ने छ भने अन्य खेलमा चिलीले अंक गुमाउनु पर्ने छ भने पेरु र कोलम्बियाको खेल बराबरीमा सकिनु पर्नेछ ।  

यस्तोमा जर्ज साम्पाओलीको अर्जेन्टिना निश्चित जितको लक्ष्यसहित सोमबार इक्वेडर पुगेको छ । अर्जेन्टिनाले इक्वेडरको घरेलु मैदानमा १६ वर्ष यता जित हात पार्न सकेको छैन । त्यसक्रममा अर्जेन्टिनाले इक्वेडरसँग तीन खेलमा प्रतिस्पर्धा गरेका थिए । इक्वेडर भने छनोटबाट बाहिरिसकेको छ ।