साओपाउलो (एजेन्सी) – अर्काे वर्ष रुसमा आयोजना हुने विश्वकप फुटबलको छनोट चरण अन्र्तगतको दक्षिण अमेरिकी छनोटका अन्तिम खेलहरु बुधबार बिहान हुदैछ ।
बिश्वकपमा सोझै स्थान बनाइसकेको पाँच पटकको विश्व विजेता ब्राजिलले घरेलु मैदानमा चिलीको सामना गर्दैछ । यस खेलको कप्तानी फ्रेन्च लिग वान क्लब पिएसजीका डिफेन्डर मार्किन्युसले गर्ने भएको छ ।
ब्राजिलको मुख्य प्रशिक्षकमा टिटे आएपछि ब्राजिलको कप्तानको आर्मब्याड लगाउने मार्किन्युस १३ औं खेलाडी बनेका छन् । यसअघि बोलिभियाविरुद्धको खेलको कप्तानी स्पेनिस क्लब रियल म्याड्रिडका मिडफिल्डर क्यासमिरोले गरेका थिए । उक्त खेल बराबरीमा सकिएको थियो ।
बिश्वकपमा स्थान बनाइसकेको ब्राजिल यो खेलमा पराजित भएपनि अंक तलिकामा कुनै फेरबदल हुने छैन । चिलीलाई भने ब्राजिलविरुद्धको खेल निकै महत्वको छ । बिश्वकपमा स्थान बनाउन चिलीलाई यो खेल जित्नैपर्ने दबाव छ ।
