एन्डरलेक्ट (एजेन्सी) – च्याम्पियन्स लिगको समूह ‘बि’ अन्तर्गत फ्रेन्च क्लब पेरिस सेन्ट जर्मन (पिएसजी)ले बेल्जियमको क्लब एन्डरलेक्टसँग भिड्दै छ । एन्डरलेक्टको घरेलु मैदानमा खेलिने सो खेल आज राति नेपाली समय अनुसार १२.३० बजे सुरु हुने छ ।

घरेलु लिगमा अपराजित पिएसजीले यस साता डिजोनलाई २-१ ले हराएको थियो । आजको खेलमा उसका लागि एडिन्सन काभानी, मार्को भेराट्टि र थियागो सिल्भा लगायत खेलाडिहरु फर्किँदै छन् । राष्ट्रिय टोलीबाट ढिला फर्किएकाले उनीहरुलाई खेलमा विश्राम दिइएको थियो ।

आफ्नो घरेलु लिगमा १० खेलमा १८ अंक जोड्दै एन्डरलेक्टले भने सामान्य सुरुवात गरेको छ । त्यस्तै एन्डरलेक्टका डिफेन्डर स्भेन कम्स एक खेल प्रतिबन्ध पछि टोलीमा फर्किँदै छन् त एन्डि नाजार र उरोस स्पाजिच भने लामो समयदेखि घाइते नै रहेका छन् ।

घरेलु टोलीले समूह चरणमा कुल ६ गोल खाँदै दुवै खेल हारेको छ भने अर्को तर्फ कुल ८ गोल गर्दै पिएसजीले आफ्ना दुवै खेल फराकिलो अन्तरले जितेको छ । समूहको अघिल्लो खेलमा पिएसजीले बायर्न म्युनिखलाई ३-० ले पनि हराएको थियो ।

यस खेलमा एन्डरलेक्टको घरलु समर्थन बाहेक अरु खासै बलियो पक्ष केही देखिँदैन । पिएसजी भने यस सिजन कमजोर प्रतिद्वन्दिमाथि निकै हावी देखिएको छ । त्यसैले उसलाई यो खेल काभानी, नेयमार र बाप्पे सम्मिलित आफ्नो आक्रमण पंक्तिको बलियो उदाहरण देखाउने एउटा अवसर पनि हुने छ ।