लण्डन (एजेन्सी) – च्याम्पियन्स लिग समूह सी अन्तर्गत इङ्ग्लिस टोली चेल्सीले घरेलु मैदानमा इटालियन क्लब रोमासँग ३-३ को बराबरी खेलेको छ । चेल्सीका लागि एडेन हाजार्डले दुई गोल गरे भने पूर्व म्यानचेस्टर सिटीका खेलाडि एडिन जेकोले रोमाका लागि दुई गोल गरेका थिए ।
चेल्सीले डेभिड लुइज र हाजार्डको गोलमार्फत खेलको ३७ औं मिनेटसम्म २-० को अग्रता लिइरहेको थियो । तर अर्का पूर्व सिटीका खेलाडि एलेक्जान्डर कोलारभको सुन्दर एकल गोल र जेकोको दोस्रो हाफका दुई गोलमार्फत रोमाले ३-२ को अग्रता लिन सफल भएको थियो ।
तर चोटबाट भर्खरै फर्केका हाजार्डले ७५ औं मिनेटमा गोल गर्दै चेल्सीका लागि १ अंक सुरक्षित गरे । चेल्सी सात अंकसहित समूह ‘सी’को पहिलो स्थानमा छ भने रोमाले ५ अंकसहित दोस्रो स्थान ओगटेको छ ।
अर्को इङ्ग्लिस टोली म्यानचेस्टर युनाइटेडले समूह एमा बेन्फिकालाई १-० ले हराएको छ । रक्षात्मक खेल पस्केको म्यानचेस्टर युनाइटेडका लागि बेन्फिका विरुद्ध ३ अंक जोड्न मार्कोस रासफोर्डको ६४ औं मिनेटको गोल पर्याप्त भएको थियो ।
रासफोर्डले लामो दुरीबाट प्रहार गरेका फ्रिकिक बेन्फिकाका युवा गोलकिपर मिले स्भिलारले बचाउने कुनै मौकै पाएनन् । जितसँगै युनाइटेडको ३ खेलमा ९ अंक रहेको छ भने बेन्फिका अंक विहीन रहेको छ ।
