पिएसजीको जितमा फेरी बाप्पे, काभानी र नेयमारको गोल

एन्डरलेक्ट (एजेन्सी) – च्याम्पियन्स लिगमा पेरिस सेन्ट जर्मेन (पिएसजी) ले शतप्रतिशत नतिजा राख्दै समूह बिमा एन्डरलेक्टलाई ४-० ले हराएको छ । पिएसजीका लागी किलियन बाप्पे, एडिन्सन काभानी, नेयमार र एन्जल डि मारियाले गोल गरेका थिए ।

पिएसजीले खेलको तेस्रो मिनेटमै किलियन बाप्पेको प्रहारमार्फत अग्रता लिन सफल भएको थियो । त्यस्तै पहिलो हाफ सकिन दुई मिनेट रहँदा पिएसजीका सिजनका सर्वाधिक गोलकर्ता एडिन्सन काभानीले बाप्पेकै पासमा सरल हेडिङ गोल गरेका थिए ।

दोस्रो हाफमा पनि पिएसजीले थप दुई गोल गर्‍यो । ६६ औँ मिनेटमा पाएको फ्रिकिकलाई डि-बक्स बाहिरबाट नेयमारले चलाखीपूर्ण गोल गरेका थिए । त्यस्तै परिवर्तित खेलाडि एन्जल डि मारियाले खेलको अन्तिमतिर गोल गर्दै पिएसजीको शान्दार जित सुनिश्चित गरेका थिए ।

समूह बिमा पिएसजीको ९ अंक रहेको छ भने एन्डरलेक्टले एक अंक पनि जोड्न सकेको छैन । यस प्रदर्शनसँगै पिएसजीको यस सिजन सबै प्रतियोगिताहरुको १३ खेलमा १२ जितसहित ४३ गोल रहेको छ ।