लिभरपुल (एजेन्सी) – युरोपा लिगमा गए रातिको खेलमा एभर्टन र लियोन बीच नराम्रो झगडा परेको छ । उक्त झगडामा दुवै टोलीका खेलाडीसहित समर्थक पनि संलग्न भएका थिए ।
एभर्टनका कप्तान एस्लि विलियम्सले लियोनका गोलकिपर रोनि लोपेसलाई बल समात्दा धकेलेपछि दुई क्लबका खेलाडीहरु बीच भनाभन सुरु भएको थियो । विलियम्सलाई लियोनका खेलाडीहरुले घेर्न आएपछि एभर्टनका खेलाडीहरु संलग्न हुँदै झगडा पनि सुरु भयो ।
भिडियोमा विलियम्सले लियोनका खेलाडीलाई मुक्का हान्न खोजेको पनि देखिएको छ । त्यसमाथि बच्चा हातमा समातेका एक एभर्टन समर्थक पनि झगडामा सामेल हुँदै लियोनका खेलाडीलाई मुक्का हानेको भिडियोमा देखिएको छ ।
झगडाको केहि मिनेटपछि विलियम्स आफैंले गोल गर्दै स्कोर १-१ बनाएका थिए । तर पूर्व चेल्सीका खेलाडी बर्ट्रान्ड ट्रायोरेले फेरि गोल फर्काउँदै लियोनलाई जित दिलाएका थिए ।
युएफाले अहिलेसम्म यो घटनाबारे केही प्रतिक्रिया दिइसकेको छैन । तर एभर्टनका कप्तान एस्लि विलियम्सले अरु खेलाडीसहित लामो प्रतिबन्ध बेहोर्ने अनुमान गर्न सकिन्छ ।
