योर्कशायर (एजेन्सी) – प्रिमियर लिगमा अपराजित रहेको म्यानचेस्टर युनाइटेड आज हडर्सफिल्डको सामना गर्दै छ । हडर्सफिल्डको घरेलु मैदानमा खेलिने सो खेल नेपाली समय अनुसार साँझ ७.४५ बजे सुरु हुने छ ।
सिजनको आफ्नो पहिलो दुई खेलमा जित हात पारेको हडर्सफिल्ड त्यसपछि भने जितविहीन रहेको छ । अर्को तर्फ बलियो सुरुवातलाई निरन्तरता दिँदै म्यानचेस्टर युनाइटेड आफ्नो प्रतिद्वन्दि म्यानचेस्टर सिटीको मात्र पछाडि तालिकाको दोस्रो स्थानमा रहेको छ ।
म्यानचेस्टर युनाइटेडका लागि डिफेन्डर फिल जोन्स र विङ्गर मार्कोस रासफोर्ड सामान्य चोटिल रहेका छन् । त्यस्तै एरिक बाई, मारोएने फेलाइनी र पल पोग्बा भने लामो समयका लागि घाइते रहेका छन् । मिडफिल्डर हेनरिख मिखितार्यनलाई पनि युनाइटेडले विश्राम दिने सम्भावना रहेको छ ।
घरेलु टोलीका लागि फिलिप बिलिङ, माइकल हेफेल र केसि पाल्मर घाइते रहेकाले खेलमा सहभागी हुने छैनन् । हडर्सफिल्ड आफ्ना पछिल्ला ६ मध्ये ५ खेलमा गोल गर्न सकेको छैन । युनाइटेड भने आफ्ना पछिल्ला १० प्रिमियर लिगको खेलमा अपराजित रहेको छ र तीमध्ये केवल एक खेलमा गोल खाएको छ ।
