म्यानचेस्टर (एजेन्सी) – प्रिमियर लिग अंक तालिकाको पहिलो स्थानमा रहेको म्यानचेस्टर सिटी आज बर्नलीसँग भिड्दै छ । सिटीको घरेलु मैदान एटिहाड स्टेडियममा खेलिने सो खेल नेपाली समय अनुसार साँझ ७.४५ बजे सुरु हुने छ ।
प्रिमियर लिग विश्लेषक मार्क सदर्न्सले यस साता भनेका थिए, “मैले प्रिमियर लिगको इतिहासमा म्यानचेस्टर सिटीजस्तो हरेक खेलमा यसरी हावी हुने टोली देखेकै छैन ।” लगातार तीन खेलमा ५ गोल अन्तरको जितपछि अधिकांश विश्लेषकहरुको मत पनि सदर्न्सको जस्तै छ ।
सिटीले लगातार छैठौं जित दर्ता गर्दै यस सिजनका ८ खेलमा २९ गोल गरिसकेको छ र आफ्ना घरेलु खेलहरुमा अझै बढि आक्रामक देखिएको छ । अर्को तर्फ बर्नली पनि पछिल्लो सिजन भन्दा निकै सुधारिएको प्रदर्शन गर्दै आएको छ । ८ खेलमा १३ अंक बटुल्ने क्रममा बर्नली आफ्ना पछिल्ला ६ खेलमा पराजित भएको छैन ।
सिटीका प्रशिक्षक पेप ग्वार्डिओलाले लगातार तीन खेलमा एउटै टोली खेलाएकाले यस खेलमा केहि हेरफेर गर्ने सम्भावना छ । कार दुर्घटनामा घाइते भएका स्टार खेलाडि सर्जियो अगुएरो पनि फिट रहेकाले उनले टोलीमा स्थान पाउने सम्भावना छ । भिन्सेन्ट कम्पनी र बेन्जामिन मेन्डि भने सिटीका लागि घाइते रहेका छन् ।
भ्रमणकारी टोलीका लागि भने गोलकिपर टम हिटन र फरवार्ड जोनाथन वाल्टर्स अझै घाइते छन् । राम्रो लयमा रहेकाले बर्नलीले यस खेलमा खेलाडीहरु खासै हेरफेर नगर्ने देखिन्छ ।
