बार्सिलोना (एजेन्सी) – स्पेनिश ला लिगामा आज अंक तालिकाको शीर्ष स्थानमा रहेको बार्सिलोनाले अन्तिममा रहेको मालागाको सामना गर्दै छ । बार्सिलोनाको घरेलु मैदान नु क्याम्पमा खेलिने सो खेल नेपाली समय अनुसार रातिको १२.३० बजे सुरु हुने छ ।
बार्सिलोनाका लागि डिफेन्डर जोर्डि अल्बा घाइते रहेकाले ओलम्पियाकोस विरुद्ध ३-० को जितमा खेलेका लुकास डिग्ने सुरुवात गर्ने सम्भावना रहेको छ । त्यस्तै अग्रपंक्तिमा लियोनल मेस्सी र लुइस स्वारेजको साथ डेनिस स्वारेज वा जेरार्ड डेउलेफेउले दिने देखिन्छ ।
मालागाले आफ्ना पछिल्ला ९ खेलमध्ये ७ खेलमा गोल समेत गर्न सकेको छैन । यस सिजन आठ खेलमा १ अंक मात्र बटुल्न सफल मालागाका लागि रेसियो रातो कार्ड पाएकाले खेल्न प्रतिबन्धित छन् ।
बार्सिलोना भने आफ्ना पछिल्ला १६ घरेलु खेलहरुमा जित दर्ता गर्दै ती सबैमा कम्तीमा दुई गोल पनि गरेको छ । मालागासँगको पछिल्लो १६ खेलमा बार्सिलोनाले १५ खेल जितेको हुँदा यस खेल पनि घरेलु टोलीले सजिलैले आफ्नो पक्षमा पार्ने देखिन्छ ।
