लण्डन (एजेन्सी) – प्रिमियर लिगको साविक विजेता चेल्सीले घरेलु मैदान स्ट्यामफोर्ड ब्रिजमा वाटफोर्डसँग ४-२ को रोमाञ्चक जित दर्ता गरेको छ । चेल्सीले यस खेलमा २-१ ले पछि परेको अवस्थालाई उल्ट्याँदै सो जित हात पारेको हो ।
पेड्रोले बक्स बाहिरबाट सुन्दर प्रहार गर्दै खेलको बाह्रौँ मिनेटमा चेल्सीलाई अग्रता दिलाएका थिए । तर वाटफोर्डले पहिलो हाफको अन्तिम मिनेटमा अब्दुलाए डुकुरेको भलिमार्फत खेल बराबरी पारेको थियो ।
त्यस्तै दोस्रो हाफ सुरु भएको ४ मिनेटमै रिचार्लिसनको पासमा रोबेर्टो पेरेराले गोल गर्दै वाटफोर्ड साविक विजेतासँग अग्रता लिन पुगेको थियो । त्यसपछि स्ट्राइकर एल्भारो मोराटाको स्थानमा आएका परिवर्तित खेलाडि मिची ब्याटसुवायीले ७१ औं मिनेटमा गोल गर्दै फेरि चेल्सीलाई खेलमा फर्काएका थिए ।
खेलमा तीन मिनेट बाँकी हुँदा डिफेन्डर सेजार एज्पिलिक्वेटाले हेडरमार्फत स्कोर ३-२ बनाएका थिए भने अन्तिम मिनेटमा ब्याटसुवायीले फेरि गोल गर्दै चेल्सीको जित सुनिश्चित गरेका थिए ।
यो जितसँगै चेल्सी अंक तालिकाको चौथो स्थानमा उक्लेको छ भने वाटफोर्ड पांचौँ स्थानमा झरेको छ । यो जित लिगमा लगातार दुई हार पश्चात चेल्सीको पहिलो जित थियो ।
