पेरिस (एजेन्सी)– पेरिस सेन्ट जर्मेन (पिएसजी) का युवा सनसनी केलियन बाप्पेले क्लबका सहकर्मी नेयमार र इडिन्सन काभानीको प्रदर्शनको उच्च तारिफ गर्नुका साथै आफुलाई स्थापित गर्न मद्दत गरेको बताएका छन् ।

१८ वर्षे फ्रान्सेली युवा अर्को वर्ष स्थायी रुपमा पिएसजीमा रहने गरि यो सिजन लोनमा मोनाकोबाट त्यहाँ पुगेका थिए । उनको उच्च प्रदर्शनको मद्दतमा गत सिजन मोनाकोले लिग १ को उपाधि जितेको थियो । उनले त्यो सिजन सबै प्रतियोगितामा गरि २६ गोल गरेका थिए ।

उनको प्रदर्शन नयाँ सिजनमा पनि यथावत छन् । हालै बाप्पेले गोल्डेन ब्वाइ अवार्डबाट सम्माजित भएका थिए । यसअघि त्यो अवार्ड वायन रुनी, सर्जियो अगुइएरो र पाउल पोग्बाले पाइसकेका छन् । नयाँ क्लबमा भिज्नका लागि नेयमार र काभानीले निकै सहज बनाइदिएको बाप्पेले बताएका छन् ।

‘नेयमार साच्चै मेरो दाई जस्ता छन् । उनी जस्तो उत्कृष्ट खेलाडी हरेक दिन सँगै रहनु मेरा लागि ठूलो विषय हो,’ उनले भने, ‘उनी साच्चै महान खेलाडी हुन्, जसले पिएसजीलाई अर्कै स्तरमा पुर्याउने छन् । उनी जस्तो खेलाडी हुनु क्लबका लागि उत्साजनक विषय हो । हामीलाई लागेको छ उनीले यहाँ सहज महसुस गरेका छन्, उनी धेरै चिज गर्ने क्षमता भएका खेलाडी हुन् ।’

बाप्पेले काभानीको पनि खुलेर प्रशंसा गरे । ‘मेरो र नेयमारका काभानी पूर्ण रुपका सहकर्मी हुन् । उनी जति बेला पनि चलायमान छन् र उनको सर्ट पनि अदभुत छ’ बाप्पले भने, ‘उनी स्वभाविक गोलकर्ता हुन् । पूर्ण व्यावसायिक र एकदमै राम्रो मान्छे हुन् । उनी विश्वका उत्कृष्ट स्ट्राइकर मध्येका एक हुन् ।’ बाप्पेले पिएसजी पुगेयता सबै प्रतिस्पर्धाका ११ खेलमा गरि ४ गोल गर्नुका साथै ४ वटा गोलमा एसिस्ट गरिसकेका छन् ।