बोर्नमथ (अजेन्सी) – प्रिमियर लिगमा आज साविक विजेता चेल्सी बोर्नमाउथको सामना गर्दै छ । नेपाली समय अनुसार रातिको १०.१५ बजे सुरु हुने सो खेल बोर्नमथको घरेलु मैदान डिन कोर्टमा खेलिने छ ।
घरेलु टोली बोर्नमथ दुई लगातर जित दर्ता गर्दै लयमा देखिएको छ । बोर्नमथले गत साता स्टोक सिटीलाई २-१ ले हराएको थियो भने मध्य साता लिग कपमा मिडल्सब्रोमाथि ३-१ को जित दर्ता गरेको थियो ।
बोर्नमथका लागि फरवार्ड जर्मेन डेफो र जोसुवा किङ दुवै घाइते भएकाले क्यालम विल्सनले सुरुवात गर्न सक्ने छन् । यो विल्सनको १० महिनामा पहिलो सुरुवात हुने छ ।
त्यस्तै चेल्सीले पनि पछिल्लो साता वाटफोर्डमाथि ४-२ को रोमाञ्चक जित हांसिल गरेको थियो भने एभर्टनलाई लिग कपमा २-१ को अन्तरले हराएको थियो । चेल्सीका लागि एन्गोलो कान्टे र भिक्टर मोजेज घाइते रहेका छन् भने डेभिड जापाकोस्टाले टोलीमा आगमन गर्न सक्ने छन् ।
चेल्सी आफ्नो ९ खेलमा १६ अंक बटुल्दै चौथो स्थानमा छ भने बोर्नमथ ७ अंकका साथ १९ औँ स्थानमा रहेको छ । चेल्सीले बोर्नमथ विरुद्धका अघिल्ला तीन खेलमा जित दर्ता गर्दै ती तीनै खेलमा ३ गोल पनि गरेको थियो ।
