पेरिस (एजेन्सी)– पेरिस सेन्ट जर्मन (पिएसजी) का कप्तान थिएगो सिल्भाले अर्जेन्टिनी स्टार एन्जल डि मारिया क्लबबाट अझै बढी खेल्न पाउन योग्य रहेको बताएका छन् । रियल म्याड्रिडका पूर्व स्टारले शुक्रबार लिग वानमा नेयमारको उपस्थिति विनाको खेलमा उच्च प्रदर्शन गरेको थियो । उक्त खेल पिएसजीले ३–० ले जितेको थियो ।

लिग वानको आधिकारिक वेभसाइटसँगको कुराकानीमा सिल्भाले भने,‘ डि मारिया हाम्रा लागि एकदमै महत्वपूर्ण खेलाडी हुन् । नेयमार विना पनि उनले आफ्नो महत्वलाई पुष्टी गरेका थिए ।’अगस्ट यता डि मारियाले दुई पटक मात्र पहिलो रोजाइमा पर्ने अवसर पाएका थिए । शुक्रबारको जितमा इन्डिसन काभानीलाई दुई गोलका लागि डि मारियाले पास मिलाइदिएका थिए ।

टोलीमा डि मारियाको भूमिका बारे सिल्भाले थपे,‘पछिल्लो सिजन क्लबका उनले जे गरे त्यसका आधारमा उनले अझै बढी खेल खेल्न पाउनुपर्दछ भन्ने लाग्छ । यद्दपी कसलाई खेलाउने वा नखेलाउने भन्ने विषयमा निर्णय लिन प्रशिक्षकलाई कठिन छ । पिएसजीमा धेरै स्तरीय खेलाडी छन् । उनको प्रदर्शनका आधारमा हामी भन्न सक्छौ आउने दिनमा पनि उनी टोलीका लागि महत्वपूर्ण खेलाडी हुन् । ’

युरी ब्रिचिची र जुलियन ड्रयाक्सलरले पनि पहिलो रोजाइमा पर्न योग्य छन् । लोकास माउरा र जाभियर पासटोरेले बेन्चबाट सुरुआत गरेर पनि उच्च प्रदर्शन गरिरहेका छन् । सिल्भाले सबैको उच्च प्रदर्शन जारी रहेकाले टोलीको बेन्च पनि बलियो रहेको बताउछन् ।

‘बलियो टोली नहुँदा सम्म ठूलो सफलता पाउन सकिन्न । त्यसका लागि २०–२२ जना उत्कृष्ट खेलाडी चाहिन्छन्’ उनले भने, ‘जसले धेरै खेल्ने अवसर पाएका छैनन्, उनीहरुले पनि टोलीको सफलताका लागि अरुको मनोबल बढाइरहेका छन् । लामो सिजनका सबैको जरुरी पर्दछ, त्यसले धेरै सफलता प्राप्त गर्ने सम्भावना रहन्छ ।’