बोर्नमथ (एजेन्सी) – प्रिमियर लिगमा साविक विजेता चेल्सीले बोर्नमथलाई उसको घरेलु मैदानमा १–० ले हराएको छ । चेल्सीको जितमा मिडफिल्डर एडेन हाजार्डले निर्णायक गोल गरेका थिए ।
पहिलो हाफमा चेल्सीका स्ट्राइकर एल्भारो मोराटाले आफ्नो टोलीलाई अग्रता दिलाउने दुई सुनौला अवसर पाएका थिए । तर उनले एउटा प्रहार पोस्टबाहिर हाने भने अर्को प्रहारलाई गोलकिपर अस्मिर बेगोभिचले राम्रो बचाऊ गरेका थिए ।
दोस्रो हाफ सुरु भएको केहि मिनेटमै चेल्सी खेलमा अग्रता लिन सफल भएको थियो । मोराटाको पासमा हाजार्डले बेगोभिचलाई नियर–पोस्टमा बिट गरेका थिए । हाजार्डको सो प्रहार चेल्सीलाई पूरा तीन अंक दिलाउन पनि पर्याप्त भयो ।
बोर्नमथले भने खेलभरी नै खासै राम्रो आक्रमण गर्न सकेन । दोस्रो हाफमा जोर्डन आइबको प्रहार डिफ्लेक्ट भई पोस्टबाट केहि माथि गएको थियो भने खेलको अन्तिम समयमा स्टेभेन कुकले खेल बराबरी गर्ने अवसर पाए पनि आफ्नो प्रहार सिधै चेल्सीका गोलकिपर थिबो कोर्टुवातिर हानेका थिए ।
यस जितसँगै चेल्सी १० खेलमा १९ अंकसहित तालिकाको चौथो स्थानमा छ भने बोर्नमथ ७ अंकसहित उन्नाइसौँ स्थानमा रहेको छ ।
