जिरोना (एजेन्सी) – स्पेनिश ला लिगामा आज साविक विजेता रियल म्याड्रिड जिरोनाको सामना गर्दै छ । जिरोनाको घरेलु मैदानमा खेलिने यस खेल नेपाली समय अनुसार रातिको ९ बजे सुरु हुने छ ।
रियल म्याड्रिडका ड्यानी कार्जाभाल ट्रेनिङमा फर्किए पनि पूर्ण फिट रहेका छैनन् । त्यस्तै अच्राफ हाकिमिले पुन: डिफेन्समा स्थान बनाउने सम्भावना रहेको छ भने इस्कोले क्रिस्टियानो रोनाल्डो र करिम बेन्जिमालाई अग्रपंक्तिमा सघाउने छन् ।
अर्को तर्फ जिरोनाका फरवार्ड क्रिस्थियन स्टुवानि प्रतिबन्धपछि टोलीमा फर्कँदै छन् । म्यानचेस्टर सिटीबाट लोनमा रहेका युवा खेलाडि एलेक्स गार्सियाले स्टुवानिलाई अग्रपंक्तिमा साथ दिने छन् ।
रियलले आफ्ना अघिल्ला चार लिग खेलमा जित दर्ता गरेको छ भने पछिल्ला १३ अवे खेलहरुमा शतप्रतिशत नतिजा कायम गरेको छ ।
गत साता डेपोर्टिभोलाई हराएकाले तालिकाको पन्ध्रौँमा रहेको जिरोनाको मनोबल पनि उच्च नै छ । तर घरेलु मैदानमा खेलिएका पछिल्ला ३ खेलमा उसले हार बेहोरेको छ ।
रियल एक खेल कम खेल्दै बार्सिलोनाभन्दा ८ अंक पछाडि रहेको छ । सो अन्तर कम गर्नका लागि पनि रियललाई यो खेल जित्नै पर्ने दबाब रहेको छ ।
