काठमाडौं (हाम्रो खेलकुद)– किर्गिस्तानमा यो साता सुरु हुने एएफसी यू १९ फुटबल च्याम्प्यिनसिपमा नेपालले उच्च प्रदर्शनको अपेक्षा राखेको युवा टोलीका प्रशिक्षक र कप्तानले बताएका छन् । कप्तान अपर्ण कार्कीले अन्तिम चरण पुग्ने आशा राखेका छन् । त्यस्तै प्रशिक्षक छिरिङ लोप्साङले टोली अघिल्लो चरण पुग्ने क्षमता राख्ने बताउँछन् ।
युवा टोलीका प्रशिक्षक छिरिङ लोप्साङ र कप्तान अपर्ण कार्की (दायाँ) ।
छनोटको समूह एमा नेपालसहित आयोजक किर्गिस्तान, बहराइन, संयुक्त अरब इमिरेट्स (युएइ) र ओमान रहेका छन् । नेपालले मंगलबार आयोजक किर्गिस्तानसँग खेल्दै प्रतियोगिताको सुरुआत गर्नेछ । नोभेम्बर २ मा बहराइनसँग प्रतिस्पर्धा गर्ने नेपालले नोभेम्बर ४ मा युएइ अन्तिम खेलमा नोभेम्बर ८ मा ओमानको सामना गर्नेछ ।
१० समूहका विजेता र समग्रमा उत्कृष्ट ५ उपविजेता र आयोजक राष्ट्रको सहभागितामा यू १९ च्याम्पियनसिपको अन्तिम चरण अर्को वर्ष आयोजना हुनेछ ।
नेपाली टोली आज त्यसतर्फ प्रस्थान गरेको छ । विदाइका अवसरमा कप्तान अपर्ण र प्रशिक्षक लोप्साङले के भने ?
अपर्ण कार्की- (कप्तान)
किर्गिस्तान जानुअघि साफ च्याम्पियनसिप जित्नुले टोलीको तयारी झनै राम्रो भएको छ । हाम्रो लक्ष्य भनेको दोस्रो चरण पुग्ने हो । टोलीको प्रशिक्षण साफमा भन्दा राम्रो छ । यसमा साफमा भन्दा नतिजा आउने हामीले आशा गरेका छौं । तर, छनोट हुने भनेर हुँदैन हामीले हामी सबै शतप्रतिशत दिनुपर्ने छ । टिम कम्बिनेसन राम्रो भएकाले हामीले बढी आशा गरेका हौं । सबै उस्तै हुन्, त्यसमध्ये युएई र बहराइन बलियो छन् भन्ने लाग्छ । दोस्रो चरण पुग्न खेल जित्नै पर्ने बताए । साफ यू–१८ च्याम्पियन बनेपछि हाम्रो मनोबल उच्च छ ।
छिरिङ लोप्साङ – प्रशिक्षक
मौकाको सदुपयोग गर्न सके हाम्रो टोली अर्को चरणमा पुग्ने क्षमता भएको टोली हो । हाम्रो लक्ष्य पनि अघिल्लो चरण पुग्ने नै हो । उमेर समूहमा नेपालको प्रदर्शन सधै राम्रो हुने गर्दछ । यू–१९ टोलीपनि त्यसबाट पछि छैन । टोलीमा फिटनेस र टेक्निकल समस्या साफपछि समाधान गरेका छौं । ४ खेलाडी पनि परिवर्तन गरेका छौं ।
बिदाईपछि युवा टोली सामूहिक तस्बिर खिचाउँदै । तस्बिर: विकेक सुवेदी/हाम्रो खेलकुद
