पेरिस (एजेन्सी)– पेरिस सेन्ट जर्मेन (पिएसजी) ले लिग १ मा शुक्रबार नेयमारलाई ‘मिस’ गर्नु परेन । पिएसजीले निसलाई ३–० ले हराएपछि विश्वका सबै भन्दा महंगा खेलाडीको अभाव महसुस गर्नु नपरेको हो । उनी त्यो खेलमा प्रतिबन्धमा थिए ।

ब्राजिलियन स्ट्राइकर अब फेरि मैदान फर्कने तयारीमा छन् । च्याम्पियन्स लिगमा पिएसजीले मंगलबार बेल्जियन टोली एन्डरलेकको सामना गर्दा नेयमार पहिलो रोजाइमा पर्ने निश्चित प्राय छ । नेयमारको टोली च्याम्यिन्स लिगको अन्तिम १६ मा पुग्न अब एक जितबाट मात्र टाढा रहेको छ ।

मंगलबार एन्डरलेकलाई हराउन सके पिएसजी अन्तिम दुई खेलअघि नै प्रि क्वार्टरफाइनल पुग्नेछ । पिएसजीले अक्टुबर १८ मा भएको पहिलो लेगमा बेल्जियन टोलीलाई ४–० ले हराएको थियो । जसमा नेयमारसँगै केलियन बाप्पे, इन्डिसन काभाी र एन्जल डी मारियाले गोल गरेका थिए ।

शुक्रबार नेयमारको अनुपस्थितिमा काभानीले २ गोल गरेपनि पिएसजीले निसलाई ३–० ले हराएको थियो । मार्सेलसँग २–२ को बराबरी भएको खेलमा नेयमारले रातो कार्ड पाएका थिए । त्यहि कारण उनले शुक्रबारको खेल प्रतिबन्धमा बिताउनु परेको थियो ।

बार्सिलोनाबाट १ सय ९८ मिलियन युरोमा पिएसजी पुगेयता ११ खेलमा उनले १० गोल गसिकेका छन् । च्याम्पियन्स लिगको समूह बीमा पिएसजीले दोस्रो स्थानको बायर्न म्युनिखलाई ३ अंकले पछाडि पारेको छ । त्यस्तै लिग १ मा ११ खेलमा पिएसजीको दोस्रो स्थानको मोनाकोको भन्दा ४ अंक बढी छ ।