काठमाडौं (हाम्रो खेलकुद) – नेपाली युवा टोली एएफसी यू–१९ च्याम्पियनसिपको छनोटको पहिलो खेलमा पराजित आयोजक किर्गिस्तानसँग पराजित भएको छ ।किर्गिस्तानको बिस्केकस्थित डोलेन ओमुरजाकोभ स्टेडियममा मंगलबार भएको छनोटको पहिलो खेलमा नेपाली युवा टोली किर्गिस्तानको युवा टोलीसँग २–० ले पराजित भएको हो ।
किर्गिस्तानका लागि बोरुबाएभ र शुकुरोभले गोल गरे । दुवै गोल पहिलो र दोस्रो हाफमा सम्भव भएको हो । घरेलु टोली किर्गिस्तानले खेलको २२ औं मिनेटमा अग्रता लिन सफल भएको थियो ।नेपाली डिफेन्सको कमजोरीको फाइदा उठाउदै बोरुबाएभले सहज गोल गरेका थिए । पहिलो हाफमा १–० को अग्रता लिएको घरेलु टोलीले खेलको इन्जुरी समयमा गोल गर्दै २–० को जित दिलाए ।
नेपालका कप्तान तथा गोलरक्षक अर्पण कार्की अगाडि बढेको मौकामा इन्जुरी टाइमको पाँचौ मिनेटमा शुकुरोभले गोल गर्दै कीर्गिस्तनलाई जित दिलाएका हुन् । घरेलु टोलीविरुद्ध राम्रो प्रदर्शन गरेपनि नेपालले गोल गर्न नसक्दा पराजित हुन पुग्यो ।६० औं मिनेटमा किर्गिस्तानका किपर बिट भैसकेको अवस्थामा रेजीन सुब्बा गोल गर्नबाट चुकेका थिए । उनको सामान्य प्रहार किर्गिस्तानका डिफेन्सले क्लियर गर्दै बराबरी टारेका थिए । पहिलो खेलमा हार बेहोरेसँगै नेपालको छनोट यात्रा कठिन बनेको छ ।
नेपालले असोजमा भुटानमा भएको साफ यू–१८ च्याम्पियनसिप जितेको थियो । कठिन मानिएको समूह ‘ए’ मा रहेको नेपालले छनोटको दोस्रो खेलमा आगमी बिहिबार बहराइनसँग प्रतिस्पर्धा गर्नेछ । त्यसपछि कात्तिक १८ मा युएई र कात्तिक २२ मा ओमानसँग अन्तिम खेल खेल्नेछ ।
छनोटमा समूहको शीर्ष स्थानमा रहने टोली फाइनल चरणको लागि छानिनेछ । त्यस्तै दोस्रो हुने मध्ये उत्कृष्ट ५ टिम र आयोजक पनि फाइनल चरणका लागि छनोट हुनेछन् । फाइनल चरणमा पुग्ने टोलीले सन् २०१८ मा आयोजना हुने एएफसी यू–१९ च्याम्पियनसिपमा सहभागिता जनाउन पाउनेछन् ।
