म्यानचेस्टर (एजेन्सी) – च्याम्पियन्स लिग समूह ‘ए’ अन्तर्गत इङ्ग्लिस टोली म्यानचेस्टर युनाइटेडले पोर्चुगलको बेन्फिकालाई २-० ले हराएको छ । युनाइटेडका लागि डेलि ब्लिन्डले एक गोल गरे भने अर्को गोल आत्मघाती गोल भएको थियो ।
खेलको पहिलो हाफमा बेन्फिकाका गोलकिपर मिले स्भिलारले एन्थोनियो मार्सियालको पेनाल्टी बचाऊ गर्दै युनाइटेडलाई अग्रता लिन वञ्चित गरेका थिए । तर पहिलो हाफको अन्तिम मिनेटमा निमान्या म्याटिचको पोस्टमा लागेर फर्केको बल उनलाई लागेर आत्मघाती गोल भएको थियो ।
युनाइटेडले दोस्रो हाफमा पनि अर्को पेनाल्टी पाउन सफल भयो । सो पेनाल्टि भने डिफेन्डर डेलि ब्लिन्डले लिँदै गोलमा परिणत गरे । यस नतिजासँगै युनाइटेडको चार खेलमा चार जित छ । बेन्फिका भने अझै अंक विहीन नै रहेको छ ।
त्यस्तै अर्को इङ्ग्लिस टोली चेल्सी भने गए राति च्याम्पियन्स लिगमा इटालियन टोली एएस रोमासँग ३-० ले पराजित हुन पुग्यो । चेल्सी खेलको पहिलो मिनेटमै स्टेफेन एल-शारावीको गोलबाट खेलमा पछि परेको थियो ।
राड्जा नाइगोलानको पासको सदुपयोग गर्दै एल-शारावीले नै ३६ औँ मिनेटमा रोमाको अग्रता दोब्बर बनाएका थिए । त्यस्तै खेलको ६३ औँ मिनेटमा एलेक्जान्डर कोलारोभको पासमा डिएगो पेरोट्टिले गोल गर्दै घरेलु टोलीको जित सुनिश्चित गरेका थिए ।
यस जितसँगै ४ खेलमा ८ अंकसहित रोमा समूह सीको शीर्ष स्थानमा उक्लेको छ भने ७ अंकका साथ चेल्सी दोस्रोमा रहेको छ । समूहको अर्को खेलमा एट्लेटिको म्याड्रिड काराबागसँग १-१ मा रोकिँदा चेल्सीलाई फाइदा पुगेको हो ।
