पेरिस (एजेन्सी)– पेरिस सेन्ट जर्मेन (पिएसजी) मा पूर्ण रुपमा सन्तुष्ट हुन नसकेका ब्राजिलियन स्टार नेयमार रियल म्याड्रिड जाने योजना बनाइरहेको डन बालेनले समाचार प्रकाशित गरेको छ । त्यहि विषयलाई लिएर नेयमारका बाबुले रियलका अध्यक्ष फ्लोरिटिनो पेरेजलाई भेटेको बताइएको छ ।

पिएसजीका प्रशिक्षक उनी इमरीसँग पनि नेयमार त्यत्ति प्रभावित नरहेको बताइएको छ । उनको ट्याटिक, खेलाउने शैली र खास गरि टोलीमा नेयमारको भूमिका स्थापित गराउन नसकेका कारण उनी सन्तुष्ट हुन सकेका छैनन् । त्यसमाथि अर्का स्ट्राइकर इडिन्सन काभानीसँग पनि नेयमारको सम्बन्ध सुरुआत मै राम्रो हुन सकेन । एउटा खेलमा पेनाल्टी कसले हान्ने भन्ने विषयमा विवाद परेयता उनीहरुबीचको सम्बन्धलाई लिएर धेरै अडकलवाजीहरु भइरहेका छन् ।

यी सब हल्लाका वावजुद पनि नेयमार अझै पिएसजीमै स्थापिन हुने कोसिस गरिरेहेको र टोलीलाई च्याम्पियन्स लिग जिताउन लागि पर्ने मनसायमा छन् । जसले उनलाई बालोन डि’ ओरको दाबेदार पनि बनाउन सक्नेछ । यदि यो सिजन सोचे जस्तो सफलता प्राप्त गर्न सकेनन् भने उनी अर्को सिजन भने अन्य क्लबमा जान सक्ने सम्भावना रहेको समाचारहरु प्रकाशित भएका छन् ।

नेयमार क्लबमा सन्तुष्ट छैनन् भन्ने समाचार आइरहेपनि उनले नयाँ क्लबमा प्रदर्शन भने उच्च गर्दै आएका छन् । पिएसजीका लागि १२ खेलमा ११ गोल गरिसकेका उनले ८ गोलमा एसिस्ट गरिसकेका छन् । लिग १ को शीर्षस्थानमा रहेको पिएसजी सहज रुपमा च्याम्पियन्स लिगको नकआउट चरणमा समेत पुगिसकेको छ ।