पेरिस (एजेन्सी)– मोनाकोका खेलाडी कामिल ग्लिकले पूर्व सहयात्री केलियन बाप्पे विश्वकै उत्कृष्ट खेलाडी बन्ने क्षमता राख्ने विश्वास दर्शाउँदै त्यहि अनुरुप उनको खेल जीवन अघि बढाइरहेको बताएका छन् ।
बाप्पेकै उच्च प्रदर्शनको मद्दतमा गत सिजन मोनाकोले लिग १ को उपाधि जितेको थियो । उनले लिगका २९ खेलमा १५ गोल गरेका थिए । यो सिजन बाप्पले लोनमा पेरिस सेन्ट जर्मेन (पिएसजी) पुगेका थिए ।
पोलिस अन्तर्राष्ट्रिय ग्लिकले बायर्न म्युनिखका रोबेर्टे लेवान्डोवस्कीसँग खेले भने कोलम्बियाका राडामेल फाल्काओसँग पनि मोनाकोमा सँगै अभ्यास गरे । तर, उनी बाप्पेबाट निकै प्रभावित छन् । १८ वर्षे फरवार्ड बाप्पे अझै उत्कृष्ट बन्ने विश्वास ग्लिकलाई छ ।
यद्दपी अहिले उनलाई केहि दबाब रहेको बताउँछन् । ‘उनलाई अहिले दबाब छ । तर उनी आफ्नो जिम्मेवारी निर्वाह गर्न सक्षम छन् ’ उनले भने, ‘उनले अझै राम्रो गर्न सक्छन् । मलाई विश्वास छ उनी एक दिन फुटबलको उच्च ठाँउमा पुग्नेछन् । त्यसका लागि उनी सक्षम छन् । ’
भविष्यको विश्व फुटबलको नेतृत्वकर्ताका रुपमा आफुले बाप्पलेलाई लिएको उल्लेख गर्दै ग्लिकले भने, ‘म भन्न सक्छु उनको भविष्य उज्वल छ । उनी यसको माथिल्लो तहमा पुग्नेमा मलाई शंका छैन । मैले अहिले सम्मसँगै खेलेका मध्ये उनी एक हुन्, सायद सबै भन्दा उत्कृष्ट हुन् ।’
