लण्डन (एजेन्सी) – गए राति च्याम्पियन्स लिगमा इङ्लिस टोली टोटनह्यामले रियल म्याड्रिडलाई ३-१ ले हराएको छ । टोटनह्यामको यस ऐतिहासिक जितमा डेले अल्लीले दुई गोल गरेका थिए ।
खेलको २७ औँ मिनेटमै रियलविरुद्ध टोटनह्याम अग्रता लिन सफल भएको थियो । केरियन ट्रिप्पिएरको पासमा अल्लीले गोल गर्दै घरेलु टोलीलाई अग्रता दिलाएका थिए । त्यस्तै दोस्रो हाफको ५६ औँ मिनेटमा बक्सको छेऊबाट सुन्दर प्रहार गर्दै अल्लीले टोटनह्यामको अग्रता दोब्बर बनाए ।
खेलको ६५ औँ मिनेटमा टोटनह्याम काउन्टर-अट्याकमा फेरि अर्को गोल गर्न सफल भयो । ह्यारी केनको राम्रो पासमा क्रिस्टियन एरिक्सनले सहज फिनिस गर्दै लगभग जित सुनिश्चित गरेका थिए ।
खेलमा १० मिनेट बाँकि छँदा क्रिस्टियानो रोनाल्डोले रियलका लागि एक गोल फर्काए पनि सो गोल सान्तवना मात्र सावित भयो । यस जितसँगै टोटनह्याम ४ खेलमा १० अंकसहित अन्तिम १६ मा पुग्न सफल भएको छ ।
समूहमा रहेका बोरुसिया डर्टमन्ड र एपोएल निकोसियाले बराबरी खेलेका छन् । त्यसैले यस नतिजाले रियलको छनोटको सम्भावनामा भने खासै असर पारेको छैन ।
घरेलु लिगमा जिरोनाविरुद्ध पनि आश्चर्यजनक हार बेहोरेको रियलको ७ अंक छ भने डर्टमन्ड र निकोसियाको समान दुई अंक रहेको छ ।
