वेल्स (एजेन्सी)– वेल्स राष्ट्रिय टिमका प्रशिक्षक क्रिस कोलम्यानले आफ्ना फरवार्ड ग्यारेथ बेल आउने अन्तराष्ट्रिय खेलहरुका लागि उपलब्ध हुने वा नहुने निर्णय रियलले लिने बताएका छन् । वेल्सले यो महिना फ्रान्स र पानामासँग मैत्रीपूर्ण खेल खेल्दैछ ।
बेल भर्खर चोटमुक्त भएर प्रशिक्षणमा फर्केका छन् तर उनले सेप्टेम्बरदेखि खेलेका छैनन् । पिंडौलाको समस्याका कारण त्यस अवधिमा बेलले रियलका लागि सात खेल गुमाइसके ।
‘हामी रियलसँग नियमित सम्पर्कमा छौं । हामी रियलले भने अनुसार नै गर्छौं । अब उनले हामीसँगै अभ्यास गर्नेछन्,’ कोलेमनले भने, ‘यदि उनीहरुले बेलले २० वा ३० मिनेट खेल्न सक्छन् भने पनि हाम्रो लागि ठिकै छ । यदि खेल्न हुन्न भन्छन् भने त्यसका लागि पनि हामी तयार छौं ।’
कोलेमनले बेलको फिटनेसलाई हानी हुने गरि केही नगरिने पनि प्रष्ट पारेका छन् । ‘हामीले उनीहरुलाई सधैको प्रगति विवरण दिइरहने छौँ,’ उनले थपे, ‘त्यही जानकारीको हिसाबमा रियलले बेल खेल्न तयार छैनन् भन्छन् भने उनी खेल्ने छैनन् ।’
