म्याड्रिड (एजेन्सी) – च्याम्पियन्स लिग तथा स्पेनिश ला लिगाको साविक विजेता रियल म्याड्रिड इङ्ग्लिस टोली टोटनह्याम हटस्परबाट तीन जनालाई अर्को वर्ष आफ्नो क्लबमा भित्र्याउन इच्छुक रहेको बताइएको छ । रियल यस साता च्याम्पियन्स लिगमा टोटनह्यामसँगै ३-१ ले पराजित भएको थियो ।

इङ्ग्लिस पत्रिका एक्सप्रेसका अनुसार रियल म्याड्रिड टोटनह्यामका दुई स्टार खेलाडि ह्यारी केन र डेले अल्ली तथा प्रशिक्षक माउरिसियो पोसेटिनोलाई साइन गर्न इच्छुक रहेको जनाइएको छ ।

यस सिजन घरेलु लिगमा रियल म्याड्रिडले १० खेलमा २० अंक बटुलेको छ र आफ्नो प्रतिद्वन्दि बार्सिलोनाभन्दा ८ अंकले पछि रहेको छ ।

रियलको यस्तै खराब लय चलिरहेको अवस्थामा रियलका अध्यक्ष फ्लोरेन्टिनो पेरेजले प्रशिक्षक जिनेदे जिदानको पनि विकल्प खोज्ने छन् । सो अवस्थामा पोसेटिनो रियलको पहिलो रोजाई हुन सक्ने बताइएको छ ।

त्यस्तै ह्यारी केनलाई भने आउने वर्षहरुमा करिम बेन्जिमाको स्थानमा क्लबमा ल्याउने सकिने बताइएको छ । यसै गरी, च्याम्पियन्स लिगमा रियलविरुद्ध दुई गोल गरेका युवा खेलाडि डेले अल्लीप्रति पनि रियल आकर्षित रहेको जनाइएको छ ।

पछिल्लो पटक सन् २००८ मा लिग कप जितेदेखि उपाधिविहिन रहेको टोटनह्यामले यस सिजन पनि केही उपाधि नजितेको अवस्थामा केन वा अल्लीले क्लब छोड्ने सम्भावना देखिएको छ ।