काठमाडौं (हाम्रो खेलकुद) – फुटबल प्रशिक्षक राजुकाजी शाक्यसहित प्राविधिक र प्रशासनिक १५ कर्मचारीलाई राष्ट्रिय खेलकुद परिषद् (राखेप) कर्मचारीसँगले आज सम्मान गरेको छ । उमेर हद (५८ वर्ष) का कारण अनिवार्य गत वर्ष कात्तिकदेखि यो महिनासम्म अवकास पाएका राखेप कर्मचारीलाई संघले विदाई स्वरुप सम्मान गरेको हो ।

अहिले राष्ट्रिय फुटबल टोलीका प्रशिक्षक समेत रहेका शाक्य त्यस्ता दुई मध्येका एक खेलाडी हुन् जो नेपालले दक्षिण एसियाली महासंघिय खेलकुद (साफ) हालको दक्षिण एसियाली खेलकुद (साग) मा दुई पटक स्वर्ण जित्नेमा पर्दछन् । शाक्य र हाल अमेरिकामा रहेका उमेश प्रधान नेपालले सन् १९८४ र १९९३ मा स्वर्ण जित्दा टोलीका सदस्य थिए ।

२००४ को नर्वौ संस्करणअघि सम्म सागमा राष्ट्रिय टोलीले खेल्ने गर्थे । अहिले सागमा यू २३ टोलीले प्रतिस्पर्धा गर्छन् । खेलाडीका रुपमा मात्र होइन प्रशिक्षकका रुपमा पनि शाक्यले स्वर्ण पदक जितिसकेका छन् । झन्डै दुई वर्षअघि भारतमा भएको १२ औं सागमा नेपालले शाक्यकै प्रशिक्षणमा नेपालले स्वर्ण पदक जितेको थियो ।

शाक्यसहित सम्मानित हुनेमभा कुस्तीका विद्यासागर पोखरेल, भारोत्तोलनका तिलकबहादुर राउत, कबड्डीका रतिया राजवंशी, क्रिकेटका अरुणकुमार अर्याल, करातेका पाल्छाङ हेन्जन छन् । त्यस्तै ह्यान्डबलका जीवन बस्नेत, भलिबलका लालबहादुर मल्ल, जिम्न्याष्टिकका मिलन भुजु, करातेका अक्बर शाह, करातेका महेशकुमार श्रेष्ठ र एथलेटिक्सका मनोहर दाहाल छन् ।

त्यस्तै अवकास पाएका लेखा अधिकृत बालेश्वर ठाकुर, नासु सूर्यबहादुर श्रेष्ठ, स्टोर किपर सेर्वोले जिरेललाई पनि सम्मान गरियो । राखेपअन्तर्गत सामान्य प्रशासन शाखाकी लेखापाल गीता ज्ञवालीलाई परिषद् सेवा पुरस्कारबाट पुरस्कृत गरियो । ज्ञवालीलाई सम्मान पत्र र नगद १० हजारसहित सम्मान गरियो ।

राखेप कर्मचारी संघको अघिल्लो कार्यसमितिका पदाधिकारीलाई सम्मानसहित बिदाइ गरिएको थियो । युवा तथा खेलकुद मन्त्री राजेन्द्रकुमार केसी, राखेपका सदस्य–सचिव केशवकुमार विष्ट र राखेपका कर्मचारी संघका नवनिर्वाचित अध्यक्ष रञ्जन थापाले सम्मान गरेका थिए । राखेप कर्मचारी संघका नवनिर्वाचित कार्यसमितिले आजै पदस्थापन गर्यो ।