म्याड्रिड (एजेन्सी)– रियल म्याड्रिडका प्रशिक्षक जिनेदिन जिदानले विंगर गेराथ बेललाई टोलीमा नियमित मौका दिने निर्णय गरेको बताइएको छ । त्यसको अर्थ स्पेनिस मिडफिल्डर इस्को फेरि पहिलो रोजाइमा नभई बेन्चमा पर्नेछन् ।

बेल घाइते हुँदा इस्कोले मौका पाउँदै आएका थिए । गत सिजनको अधिकांश समय बेल चोटग्रस्त थिए । जसका कारण इस्कोले बढी मौका पाए । अहिले फेरि बेल फर्केपछि उनलाई नियमित खेलाउने जिदानको योजना रहेको बताइएको छ ।

पछिल्ला समाचारहरुका अनुसार जिदानले बेल र इस्कोका बारेमा निर्णय लिन लामो समय नलिएको उल्लेख गरिएको छ । स्पेनिस पत्रिका डन बालोनका अनुसार सिजनको बाँकी समय जिदान बेललाई महत्वपूर्ण भूमिका दिन चाहन्छन् ।

त्यसको अर्थ अब महत्वपूर्ण खेलमा इस्कोको सट्टा बेलले सुरुआत गर्ने सम्भावना रहन्छ । जिदान बेलमाथि दबाब बढाउने पक्षमा छैनन् । प्रशिक्षक आफ्ना खेलाडीको फिटनेस कत्तिको सुधार भएको छ त्यो भने जान्न चाहन्छन् ।

खासमा जिदानको रोजाइमा टोलीको अग्रपंक्ति  बिबिसी (बेन्जेमा, बेल र क्रिस्टियानो) नै हो । उनीहरुलाई साथ दिन मिडफिल्डमा टोनी क्रुस, लुका मोड्रिच र कासिमेरो रहनेछन् । त्यसैले अब इस्कोले धेरै समय बेन्चमा बिताउनु पर्ने हुन्छ । क्रिसमस विश्राम पछि कोपा डेल रेमा रियलले नुमान्सियालाई हराएको थियो ।