पोखरा (हाम्रो खेलकुद) – आहा-रारा गोल्ड कपको तेस्रो क्वाटरफाइनलमा नेपाल एपिएफ क्लबले रुस्लान थ्री स्टार क्लबको सामना गर्दै छ । मदन भण्डारी स्मृति इटहरी गोल्डकप फुटबल प्रतियोगिताको उपाधि जितेको थ्री स्टार उच्च मनोबलका साथ मैदानमा उत्रने छ ।

प्रतियोगिताको प्रि-क्वाटरफाइनलमा एपिएफले आदित्य चौधरीको निर्णायक गोलमा संकटालाई हराएको थियो भने थ्री स्टारले प्रतियोगितामा सोझै अन्तिम ८ मा स्थान पाएको हो ।

यसअघि इटहरी गोल्डकपको पहिलो खेलमा थ्री स्टारसँग पराजित हुँदै बाहिरिएको एपिएफका प्रशिक्षक रत्न काजी महर्जन त्यस खेललाई पाठको रुपमा लिँदै आहा गोल्ड कपमा खेल सुधार्ने बताउँछन् । “खप्तड गोल्ड कपमा खेलेर थोरै मात्र विश्राम पाएका कारण हाम्रा खेलाडीहरुमा फिट्नेसको समस्या देखियो । त्यसैले हामीले इटहरीमा थ्री स्टारसँग पराजित भयौं । तर त्यो खेलमा गरेको गल्तीलाई सुधार्दै आज खेल्नेछौं ” , महर्जनले हाम्रो खेलकुद डट कमलाई भने । त्यस्तै श्याम नेपाली पूर्ण रुपमा फिट नभएको कारण आजको खेलमा खेल्ने निश्चित नभएको उनले बताए ।

प्रतियोगिताको तालिका र अहिलेसम्मको नतिजा हेर्नुहोस। 

थ्री स्टारका लागि यस प्रतियोगितामा भने विमल घर्ती मगर उपलब्ध हुने छैनन् । गत महिना थ्री स्टारसँग अनुबन्धित भएका उनी भारतीय आइ-लिग क्लब मोहन बगानसँग आबद्ध भएका छन् । उनले थ्री स्टारसँग धनगढीमा खप्तड गोल्डकप र इटहरीमा मदन भण्डारी स्मृति इटहरी गोल्डकपमा सामेल भए ।

थ्री स्टारका प्रशिक्षक मेघराज केसी भने विमलको अनुपस्थितिले टोलीलाई धेरै असर नपार्ने बताउँछन् ।”विमलले राम्रो अवसर पाएका छन् । हामीले उनलाई राम्रोसँग विदाई गर्यौं । तर थ्री स्टार १ वा २ खेलाडीमा निर्भर नभएर टीम वर्कमा विश्वास गर्ने टोली भएकाले हामी उनको अनुपस्थितिमा पनि राम्रो खेल्ने छौं ” , केसीले हाम्रो खेलकुद डटकमलाई बताए ।

इटहरीमा उपाधि जितेकाले टोली उच्च मनोबलमा रहेपनि छोटो समयमा दुई प्रतियोगितामा खेल्नु पर्दा खेलाडी थकित रहेको केसीले बताए । “हामीले इटहरीमा शनिबार खेलेपछि लामो दुरी यात्रा गरेर पोखरा आएका छौं , त्यसैले खेलाडीमा थकान देखिन्छ । तर यो थकानलाई भुलेर पोखरामा जुन थ्री स्टारको क्रेज छ , त्यसलाई कायम राख्ने हाम्रो तर्फबाट सक्दो प्रयास गर्नेछौं ” , केसीले थपे ।