काठमाडौं (हाम्रो खेलकुद)– रुस्लान थ्री स्टार क्लबका कप्तान विक्रम लामाको दाहिने खुट्टाको आइतबार विहान बिहान १ बजे ग्राण्डी अन्तर्राष्ट्रिय अस्पतालमा सफल शल्यक्रिया भएको छ । धरानमा शनिबार सम्पन्न २० औं बुढासुब्बा रेडबुल गोल्डकप फुटबल प्रतियोगिताको फाइनलको दौरान पहिलो हाफमा उनको खुट्टामा भाच्चिएपछि उपचारका लागि हिजै राजधानी ल्याएको थियो ।

वरिष्ठ अर्थोपेडिक सर्जन तथा ग्राण्डीका मेडिकल डाइरेक्टर डा चक्रराज पाण्डेको टिमले विक्रमको गोडाको शल्य क्रिया गरेको हो । आइतबारबाटै विक्रमको फिजियोथेरापी सुरु गरिने अस्पतालले प्रेस विज्ञप्तीमार्फत जानकारी गराएको छ । डा. पाण्डेका अनुसार विक्रमलाई खेल मैदानमा फर्कन ६ देखि ८ महिना लाग्नेछ ।

नेपाल पुलिससँगको फाइनल खेल्दा विपक्षी खेलाडीसँग ठोक्किएर उनको दायाँ नली खुट्टा भाच्चिएको छ । पहिलो हाफमा पुलिसका तेज तामाङसँग ठोक्किएपछि विक्रम घाइते भएका थिए । विक्रमको नेतृत्वमा थ्री स्टारले तीन सातामा ३ वटा नकआउट फाइनल खेलेको छ ।

माघको १२ गते मदन भण्डारी स्मृति इटरी गोल्ड कपको उपाधि जितेको थ्री स्टारले अघिल्लो शनिबार पोखरामा आहा रारा गोल्डकप फुटबल प्रतियोगिताको फाइनल खेलेको थियो । बुढासुब्बा थ्री स्टारको वर्षको दोस्रो उपाधि हो ।