सिमरा (हाम्रो खेलकुद) – नवौं सिमरा गोल्डकप अन्तर्गत दोस्रो सेमिफाइनलमा त्रिभुवन आर्मी क्लबले वीरगंज युनाइटेडमाथि ३-० को सहज जित दर्ता गरेको छ । यस जितसँगै आर्मीले फाइनलमा थ्रीस्टारसँग भेट पक्का गरेको छ ।
आजको सेमिफाइनलमा आर्मी वीरगंजविरुद्ध निकै हावी देखियो । खेलको ३८ औं मिनेटमा टंक बस्नेतको क्रस भरत खवासले निरन्त्रणमा नलिए पनि दिनेश हेम्जनले सो अवसर सदुपयोग गर्दै टोलीलाई खेलमा अग्रता दिलाए ।
त्यस्तै खेलको ६० औं मिनेटमा भरत खवासको प्रहार डिफ्लेक्ट हुँदै वीरगंजको आत्मघाती गोल हुन पुगेको थियो । त्यसैगरी खेलको ६७ औं मिनेटमा टंक बस्नेतको पासमा दिप लामाले गोल गर्दै स्कोर ३-० बनाएका थिए ।
आर्मीले आफ्नो जित अझै फराकिलो बनाउन सक्थ्यो । तर दोस्रो हाफमा दिनेश, सुमन अर्याल र सन्तोष तामाङले पाएका अवसरहरु गुमाउँदा आर्मी ३ गोलमै सीमित रह्यो ।
खेलको अन्तिम समयतिर आर्मीका गोलकिपर विकेश कुथुलाई परिवर्तन गरिएको थियो । अघिल्लो खेलमा चोटिल भएका विकेशको फिटनेसमा केहि समस्या देखिएको छ ।
अब फाइनल खेलमा आर्मी थ्रीस्टारको सामना गर्ने छ । सो खेल पर्सि फाल्गुन ५ गते खेलिने छ ।
