विनोदबाबु रिजाल
चितवन– नेपाल एपिएफ क्लब चितवनको नारायणगढस्थित क्याम्पाचौरमा जारी १३ औं टुवोर्ग विकास रनिङ शिल्ड नकआउट फुटबल प्रतियोगिताको क्वार्टरफाइनलमा पुगेको छ ।
फाइल तस्बिर
भरतपुर फुटबल क्लबलाई बिहीबार १–० ले हराउँदै एपिएफ अन्तिम आठमा प्रवेश गरेको हो । निकै प्रतिस्पर्धात्मक खेलमा एपीएफका लागि खेलको दशौं मिनेटमा श्याम नेपालीले गरेको गोल नै खेलको निर्णायक बन्यो ।
एपिएफले सेमिफाइनल प्रवेशका लागि शनिबार साविक विजेता सिएमजी क्लब संकटाको सामना गर्नेछ । प्रतियोगितामा पहिलो चरणको अन्तिम खेलमा शुक्रबार ए डिभिजनको लक्ष्मी हुन्डाई मनाङ मस्र्याङ्दीले सुदूरपश्चिम ११ को सामना गर्नेछ । यसले नै क्वार्टरफाइनल समीकरण पूरा हुनेछ ।
प्रतियोगितामा कूल १२ टिमको सहभागिता छ । चितवनकै सर्वाधिक धनराशी पुरस्कार भएको यस प्रतियोगिताको विजेताले उपाधिसहित ५ लाख रुपैयाँ र दोस्रो हुने टोलीले २ लाख ५० हजार रुपैयाँ प्राप्त गर्नेछ ।
