म्याड्रिड (एजेन्सी)– नेयमारले खेल जीवनलाई नयाँ उचाई दिने हो भने पेरिस सेन्ट जर्मेन (पिएसजी) छाडेर रियल म्याड्रिड जानु पर्ने क्लबका पूर्व हस्तीले बताएका छन् ।
सिजनको सुरुआतमा बार्सिलोनाबाट विश्व कीर्तिमानी रकम २ सय २२ मिलियन युरोमा पिएसजी पुगेको २५ वर्षे नेयमार पछिल्लो समय भने रियल जाने व्यापक चर्चा चलिरहेको छ । १५ वर्ष रियलमा बिताएका गुटी नेयमार खेल जीवनको नयाँ उचाईका लागि रियल जानु पर्ने बताउँछन् ।
‘मलाई लाग्छ अन्तत उनलाई बार्सिलोना जस्तो महत्वपूर्ण क्लब आवश्यक पर्दछ । अहिले उनले पिएसजीमा प्रभाव जमाएको च्याम्पियन्स लिगमा मात्र याद हुन्छ ,’ गुटीले भने, ‘तर, उनी भविष्यमा अझै राम्रो हुन चाहन्छन् भने उनी रियल जान आवश्यक छ । तर क्रिस्टियानो रोनाल्डो हुँदा हुँदै नेयमार रियल जाने सम्भावना केहि कठिन पनि छ । उनी दुई तीन वर्षमा भने त्यहाँ पुग्न सक्छन् ।’
रियल अहिले २४ खेलमा ४८ अंक जोड्दै ला लिगाको तेस्रो स्थानमा छन् । शीर्षस्थानको बार्सिलोनासँग रियल अझै १४ अंकले पछाडि छ । लिग १ मा २६ अंकमा ६८ अंक जोडेको पिएसजी दोस्रो स्थानको मोनाकोभन्दा १० अंकले अगाडी छ ।
